އެމްއެންޑީއެފް އިން އިސްރަށްވެހިންނަށް މެޑިކަލް ކޭމްޕެއް ހިންގައިފިއެވެ.

މިއީ އެމްއެންޑީއެފް މާލޭ އޭރިއާ ކޮމާންޑުން އިންތިޒާމުކޮށްގެން ސެނެހިޔަ މިލިޓަރީ ހޮސްޕިޓަލުގެ އެހީތެރިކަމާއެކު ކުރިއަށްގެންދިޔަ ކޭމްޕެކެވެ.

އުމުރުން 55 އަހަރުން މަތީގެ އިސްރަށްވެހިންނަށް ކުރިއަށްދިޔަ މި ކޭމްޕުގައި ހެލްތު ޗެކަޕް ހެދުމާއި، ހެލްތު ސްކްރީނިންގ ކުރިއަށް ގެންގޮސްފައިވެއެވެ. އަދި ކެންސަރާ ގުޅޭ މައުލޫމާތު ދިނުމާއި ސްކްރީން ކުރުމަށް ނަން ނޯޓުކުރުމުގެ ހިދުމަތް ވަނީ ފޯރުކޮށްދީފައެވެ.

މީގެއިތުރުން ސިއްހީ ދާއިރާއާ ގުޅުންހުރި މައުލޫމާތު ވެސް ބައިވެރިނަށް ވަނީ ފޯރުކޮށްދީފައެވެ.

މިއީ އިސްރައްވެހިންނަށް ދިމާވާ ސިއްހީ މައްސަލަތައް އެއްތަނަކުން ދެނެގަތުމާއި، އެކަންކަމާ ގުޅޭ މައުލޫމާތު އެފަރާތްތަކަށް ފޯރުކޮށްދިނުމަށް ކުރިއަށްގެންދިޔަ ކޭމްޕެކެވެ.

މި ކޭމްޕުގައި އެމްއެންޑީއެފް މާލެ އޭރިއާ ކޮމާންޑާއި ސެނެހިޔަ މިލިޓަރީ ހޮސްޕިޓަލާއި އައިކެއަރ އޮޕްޓިކަލްސް، ދަމަނަވެށި، ހުޅުމާލެ ހޮސްޕިޓަލްގެ ވެލް ވިމަން ކްލިނިކް ވަނީ ބައިވެރިވެފައެވެ. އަދި މާސްޓަރ ޑެންޓަލް ކެއަރ ސެންޓަރ، ކޮމިއުނިޓީ ވޮލަންޓިއަރ ނަރސަސް އަދި އެލްޒައިމާޒް ސޮސައިޓީ އޮފް މޯލްޑިވްސް އިން ވަނީ ބައިވެރިވެފައެވެ.

އިސްރަށްވެހިންގެ ނާދީގައި ކުރިއަށް ގެންދިޔަ މި ކޭމްޕުގައި 97 ފަރާތަކުން ބައިވެރިވިއެވެ.