2025 ވަނަ އަހަރުގެ ދައުލަތުގެ ބަޖެޓު ހުށަހެޅުން މި މަހު 29 ވަނަ ދުވަހު އޮންނާނެކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޓެކްސް ބިލްތައް ދިރާސާ ކުރުމަށް އެކުލަވާލައިފައިވާ، މާލިއްޔަތު އަދި އިގުތިސާދީ ކޮމިޓީގެ ޖޮއިންޓް ކޮމިޓީގައި ވާހަކަ ދައްކަވަމުންނެވެ.

"އަންނަ ބުރާސްފަތި ދުވަހު ރައްޔިތުންގެ މަޖިލީހުގެ ޖަލްސާއެއް ބާއްވައި، އަންނަ އަހަރަށް ލަފާ ކުރާ ބަޖެޓު އެ ދުވަހު ހުށަހަޅާނެ." ނާޒިމް ވިދާޅުވިއެވެ.

ބަޖެޓު ހުށަހެޅުމުގެ ޖަލްސާ އަންނަ ބުރާސްފަތި ދުވަހު ބާއްވަން މަޖިލީހުގެ ރައީސް އަބްދުއްރަހީމް އަބްދުﷲ ނިންމަވައިފައިވާކަން ހާމަކުރައްވައި، ނާޒިމް ވަނީ ކޮމިޓީއަށް ފޮނުވައިފައިވާ ހަތަރު ޓެކްސް ބިލުގެ މަސައްކަތްތައް މާދަމާގެ ނިޔަލަށް ނިންމަން ފެނިވަޑައިގަންނަވާ ކަމަށް ވިދާޅުވެފައެވެ.

އެހެންކަމުން ނާޒިމް ވިދާޅުވި ގޮތަށް، ޓެކްސް ބިލްގެ މަސައްކަތްތައް ނިންމަން އެ ކޮމިޓީން ވަނީ ފާސްކޮށްފައެވެ. އެއް ދުވަސް ތެރޭގައި ބިލްތައް ދިރާސާކޮށް ނިންމަން ފެންނަ ކަމަށް 16 މެންބަރުން ވަނީ ވޯޓު ދެއްވާފައެވެ. ނުފެންނަކަމަށް ތިން މެންބަރުން ވޯޓުދެއްވިއެވެ.

ސަރުކާރުން މިހާރުވަނީ 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ވެސް ހުށަހަޅާފައެވެ. މި އަހަރަށް ފާސްކުރީ 49.8 ބިލިއަން ރުފިޔާގެ ބަޖެޓެކެވެ.