ވިލިމާލެ ހޮސްޕިޓަލުގައި ދަތުގެ ފަރުވާ ދިނުމުގެ ހިދުމަތް ފަށައިފިއެވެ.

މި ހިދުމަތް ފަށާފައިވަނީ އެ ހޮސްޕޓަލުގައި މިކަަމަށްޓަކައި ބޭއްވި ހާއްސަ ހަފުލާއެއްގައި ހެލްތު މިނިސްޓަރ ޢަބްދުﷲ ނާޒިމް އިބްރާހީމް އެވެ.

އޮކްޓޯބަރ 26 ވީ ހޮނިހިރު ދުވަހުގެ ރޭ ބޭއްވި މި ރަސްމިއްޔާތުގައި އެމިނިސްޓްރީގެ އިސްވެރިންނާއި، މާލޭގްރޫޕް އޮފް ހޮސްޕިޓަލްގެ އިސްވެރިން އަދި ވިލިމާލެ ހޮސްޕިޓަލުގެ އިސްވެރިން ވަނީ ބައިވެރިވަޑައިގެންފައެވެ.

މިނިސްޓަރ ނާޒިމް ވަނީ ރާއްޖޭގައި ދެވޭ ސިއްހީ ހިދުމަތާއިމެދު ރައްޔިތުންގެ ހިތުގައި ބޮޑެތި ސުވާލުތަކެއް އުފެދިފައިވާ ކަމަށެވެ.

އެމަނިކިފާނު ވަނީ ތަރައްގީވެފައިވާ ގައުމެއްގައި ބޮލަކަށް ހަރަދު ކުރާ ވަރަށް ރާއްޖޭގެ ސިއްހީ ނިޒާމުގައި ވެސް ހަރަދު ކުރާކަން ވެސް ފާހަގަކުރައްވާފައެވެ. 

މީގެއިތުރުން ރާއްޖޭގެ މިހާރުގެ ސިއްހީ ނިޒާމަށް ބޭނުންވަނީ ވަރަށް ހަރުދަނާ މެނޭޖްމެންޓް ސޮލިއުޝަނެއް ކަމަށާއި ހަމައެކަނި ފައިސާ ހަރަދުކޮށް، އިމާރާތް އަޅައި، މެޝިންތަކާ ޑޮކްޓަރުން އިތުރުކޮށްގެން ރައްޔިތުން ބޭނުންވާ ހިތްހަމަޖެހުން ގެނެސް ނުދެވޭނެ ކަމަށް ވެސް ވިދާޅުވިއެވެ.

ވިލިމާލެ ހޮސްޕިޓަލުގައި މި ހިދުމަތް ފަށާފައިވާއިރު، މިހާރު ހުރި ހޮސްޕިޓަލް އިތުރަށް ތަރައްގީކޮށް، 100 އެނދުގެ ހޮސްޕިޓަލެއް އެޅުމަށް ވަނީ ނިންމާފައެވެ.