ޕޮލިޓެކްނިކްގެ ތަމްރީނު ޕްރޮގްރާމްތައް ށ. މިލަންދޫގައި ހިންގުމަށް މަޝްވަރާ ބައްދަލުވުމެއް ބާއްވައިފިއެވެ.

އެރަށު ކައުންސިލާއެކު ބޭއްވި މި ބައްދަލުވުމުގައި މިލަންދޫއަށް ނިސްބަތްވާ ރައްޔިތުންނަށް މަތީ ތަޢުލީމާއި ތަމްރީނުގެ ފުރުޞަތުތަށް ފަހިކޮއްދިނުގެ މައްޗަށް އަލިއަޅުވާލާފައިވެއެވެ.

އެގޮތުން ޕޮލިޓެކްނިކް އަދި މޯލްޑިވިސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ) މެދުވެރިކޮށް، ނެޝަނަލް ޓްރޭޑް ޓެސްޓިންގ، ނެޝަނަލް އެޕްރެންޓެސްޝިޕް ޕްރޮގްރާމްތަކާއި ޒުވާނުންގެ ހުނަރު އިއާދަކުރުމަށް އެތައް ތަމްރީނު ޕްރޮގްރާމްތަކެއް ކުރިއަށް ގެންދިޔުމާއިމެދު މަޝްވަރާކުރެވުނު ކަމަށް ހަޔަރ އެޑިއުކޭޝަން މިނިސްޓްރީން ވިދާޅުވެއެވެ.

ރާއްޖޭގެ މަސައްކަތްތެރިކަމުގެ ދާއިރާތަކަށް ބޭނުންވާ ފަންނުވެރިން ބިނާކުރުމުގެ މަސައްކަތަށް ސަރުކާރުން ވަނީ ވަރަށް ބޮޑު އަހަމިއްޔަތެއް ދެއްވާފައެވެ.

މި މަސައްކަތް ކާމިޔާބުކުރުމަށް މޯލްޑިވިސް ޕޮލިޓެކްނިކް އިން އަންނަނީ ރަށްރަށުގެ ކައުންސިލްތަކާއި ޖަމިއްޔާ ޖަމާއަތްތަކާއި ގުޅިގެން އެ ރަށްރަށުގައި ނެތެމުންދާ ފަންނުތަށް ދިރުވައި އަލާކުރުމަށް، ކަމާއިބެހޭ ތަޖްރިބާކާރުންނާއި އެކު ތަމްރީން ޕްރޮގްރާމްތައް ހިންގައި، ފަންނުވެރި ޒުވާނުން ބިނާކުރުމަށް މަސައްކަތްކުރަމުންނެވެ.