އިތުރު ތިން ކެފޭއަކުން ފަސް ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް އިމިގްރޭޝަނުން ވިދާޅުވީ މިއީ އޮކްޓޯބަރ 26 ވަނަ ދުވަހު މާލޭގައި ކުރިއަށް ގެންދިޔަ ރެއިޑު އޮޕަރޭޝަންގެ ތެރެއިން ފެނުނު މީހުން ކަމަށެވެ.

އެ ރެއިޑުގައި މާލޭގެ ތިން ކެފޭއެއް ބަލައި ފާސްކޮށްފައިވާ ކަމަށާއި އިމިގްރޭޝަނުގެ ބެލުމުގެދަށަށް ގެނައީ އެތަނުން ބައެއް ކެފޭތަކުގައި ގަވާއިދާ ހިލާފަށް އުޅެމުންދިޔަ ފަސް ބިދޭސީން ކަމަށް ވެސް ވިދާޅުވިއެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަތައް ބޮޑުވެ، އެ މައްސަލަތައް ހައްލު ކުރުމަށް އެ އިދާރާ އިން ސިލްސިލާކޮށް ކުރިއަށްގެންދާ ބަލައި ފާސްކުރުމުގެ އޮޕަރޭޝަނުގައި މިހައިތަނަށް 4300 އަށް ވުރެ ގިނަ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސް، ޑީޕޯޓްކޮށްލާފައިވާ ކަމަށް ތަފާސްހިސާބުން ދައްކައެވެ.

ރާއްޖޭގައި ދިރިއުޅޭ ހުރިހައި ބިދޭސީން ވެސް ގަވާއިދުތަކަށް ފުރިހަމައަށް ޢަމަލުކުރުމަށް އިމިގްރޭޝަނުން ދަނީ ތަކުރާރުކޮށް އިލްތިމާސް ކުރައްވަމުންނެވެ.