އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާގެ މުވައްޒަފުން މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނަށް މުވައްޒަފުން އަހުލުވެރިކުރުމަށް ތަމްރީނު ޕްރޮގްރާމެއް ކުރިއަށް ގެންގޮސްފިއެވެ. 

މި ޕްރޮގްރާމު ކުރިއަށް ގެންގޮސްދެއްވާފައި ވަނީ އިންފޮމޭޝަން ކޮމިޝަނަރުގެ އޮފީހުގެ ފަރާތުންނެވެ.

މި ތަމްރީނުގައި މަޢުލޫމާތަކީ ކޮބައިކަމާއި، މަޢުލޫމާތު ދެވޭ ގޮތްތަކާއި، މައުލޫމާތަށް އެދުމުން ކަންތައް ކުރާނެ ގޮތާއި، އިސްތިސްނާ ހާލަތްތަކަށްވަނީ އަލި އަޅުވާލެވިފައެވެ. އޭގެ އިތުރުން އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާއިން މަޢުލޫމާތު ހިއްސާކުރުމުގައި ބަލަން ޖެހޭ ކަންތައްތަކާއި، މައުލޫމާތު ހިއްސާކުރެވޭނެ މިންވަރާއި ގުޅޭގޮތުން ވެސް މި ސެޝަންގައި ވަނީ އަލިއަޅުވާލައްވާފައެވެ.

މަޢުލޫމާތު ހޯދާ ލިބިގަތުމަކީ ރައްޔިތުންގެ ހައްޤެކެވެ. އެހެންކަމުން، މި ތަމްރީނަކީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ކުރަމުން ގެންދާ މަސައްކަތްތަކާއި، ބަލަހައްޓަމުން ގެންދާ މަޢުލޫމާތުތަކުގެ ތެރެއިން ފަރުދުން ހޯދަން އެދޭ މަޢުލޫމާތު ހާމަކަންބޮޑުގޮތެއްގައި ރައްޔިތުންނަށް ފޯރުކޮށްދިނުމަށް ބާރުއެޅުމާއި، މުވައްޒަފުން މި ކަންކަމަށް އަހުލުވެރިކުރުމަށް ކުރިއަށް ގެންދިޔަ ޕްރޮގްރާމެކެވެ.

ރައްޔިތުންނަށް މައުލޫމާތު ފޯރުކޮށްދިނުމުގައި ސަރުކާރުން ގެންގުޅޭ ހާމަކަންބޮޑު ދެފުށްފެންނާނެހެން މައުލޫމާތު ހިއްސާކުރުމުގެ ސިޔާސަތުގެ ދަށުން، އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާއިން ރައްޔިތުން ހޯދަން އެދޭ މައުލޫމާތުތައް ދެވެން އޮންނަ އެންމެ ފުޅާމިނެއްގައި ފޯރުކޮށްދެމުން ގެންދާނެއެވެ.

އޭގެ އިތުރުން ޚަބަރު ފަތުރާ ވަސީލަތްތަކާއި ސޯޝަލް މީޑިއާގެ އެކި މަންސަތައް މެދުވެރިކޮށް ވުޒާރާއިން ކުރާ މަސައްކަތްތަކާއި، ހިންގާ ޕްރޮގްރާމުތަކާއި، ރައްޔިތުންނަށް ދޭން ބޭނުންވާ މުހިންމު މެސެޖުތައް ފޯރުކޮށްދެމުން ގެންދާނެއެވެ.