"ޑީސަންޓް ވޯރކް ކަންޓްރީ ޕްރޮގްރާމް" ގެ މަސައްކަތް ފެށުމުގެ ރަސްމިއްޔާތު ބާއްވައިފިއެވެ.

މިއީ އިންޓަރނޭޝަނަލް ލޭބަރ އޮގަނައިޒޭޝަނާއި ދިވެހި ސަރުކާރާ ގުޅިގެން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމެކެވެ.

މި ރަސްމިއްޔާތުގައި "ޑީސަންޓް ވޯރކް ކަންޓްރީ ޕްރޮގްރާމް"ގެ ތަފްޞީލީ ޕްލޭން ހިއްސާކުރެވުނެވެ. އަދި އޭގެ ދަށުން އުފެދޭ ޓްރައިޕާޓައިޓް ކޮމިޓީތަކުގެ މައުލޫމާތާއި، މި ޕްރޮގްރާމްގެ ސަބަބުން ހާސިލުވާނެ ލަނޑުދަނޑިތަކާ ބެހޭ މައުލޫމާތު ފޯރުކޮށްދިނެވެ.

މި ބައްދަލުވުމުގައި ހަޔަރ އެޑިއުކޭޝަން މިނިސްޓަރު ޑރ. މަރްޔަމް މާރިޔާ ވިދާޅުވީ މި ޕްރޮގްރާމްގެ ސަބަބުން ގައުމީ ވަޒީފާއާ ގުޅޭ ސިޔާސަތުތަކާއި ލަނޑުދަނޑިތައް އެކުލަވާލައި ހާސިލުކުރުމަށް ބެނުންކުރާ މަގުޗާޓަކަށް މި ޕްރޮގްރާމް ވެގެންދާނެކަމަށް އުންމީދުކުރައްވާކަމަށެވެ.

ހާއްސަކޮށް، މި ޕްރޮގްރާމުގެ ސަބަބުން ވަޒީފާތައް އުފެދި، އަންއެމްޕްލޯއިމަންޓް ލެވެލް ދަށްވެ، މަސައްކަތުގެ މާހައުލުގައި ލިބިދެވޭ ހައްގުތައް ކަށަވަރު ކުރުމާއި، އިޖްތިމާއީ ރައްކާތެރިކަން ކުރިއެރުވުމާއި، އިޖްތިމާއީ ޑައިލޮގް ކުރިއެރުވުމަށް މަގުފަހިވާނެކަމަށް ޤަބޫލުކުރައްވާކަމަށް ވެސް ވިދާޅުވިއެވެ.

މީގެއިތުރުން މިއަހަރު ރައީސް ޑރ. މުޙައްމަދު މުޢިއްޒު ތަސްދީގުކުރެއްވި އިންޑަސްޓްރިއަލް ރިލޭޝަންސް ގާނޫނާއި މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގާނޫނުގެ ސަބަބުން، ވަޒީފާދޭ ފަރާތްތަކާއި ވަޒީފާއަދާކުރާ ފަރާތްތަކުގެ ޖަމިއްޔާތައް ތަމްސީލުކުރާ ފަރާތްތަކަށް އެފަރާތްތަކުގެ ކަންބޮޑުވުންތައް ހިއްސާކުރުމަށް ޓްރައިޕާޓައިޓް ލޭބަރ އެޑްވައިޒަރީ ކޮމިޓީތަކުން ސޯޝަލް ޑައިލޮގް ކުރިއަރުވައިދެއްވަން މަސައްކަތްތައް ކުރައްވާނެ ކަމަށް އުންމީދު ކުރައްވާ ކަމަށް ވެސް ވިދާޅުވިއެވެ.