ސުނާމީ ކާރިސާއިން ލިބުނު ގެއްލުންތަކުން އަރައިގަނެ، ވިލުންތެރި ފަތިހަކަށް ގައުމު ގެންދެވުނީ، މާތްﷲ މި ގައުމަށް މިންވަރުކުރައްވާފައިވާ އިސްލާމީ ހިދާޔަތުގެ ނޫރުގެ ސަބަބުން ކަމުގައި ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކިުފާނު މިފަދައިން ވިދާޅުވީ "ވިލުންތެރި 20" މައުރަޒު ހުޅުވުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

ޑިސެމްބަރ 26 ވަނަ ދުވަހު ނެޝަނަލް އާޓް ގެލަރީގައި ބޭއްވި މިރަސްމިއްޔާތުގައި ނައިބު ރައީސް ވަނީ އަލަށް އެކުލަވާލި ދިވެހިރާއްޖޭގެ "ކާރިސީ ހިރާސް ކުޑަކުރުމުގެ އިސްތިރާޖު " މި ވެރިކަމުގެ ޅަފަތުގައި އެކުލަވާލެވުމުން ދައްކުވައިދެނީ، ރައީސް ޑރ. މުޙައްމަދު މުޢިއްޒުގެ ސިޔާސަތު ބައްޓަންކުރެއްވުމުގައި މިކަމަށް ދެއްވާ އަހަންމިއްޔަތުކަން ކަމުގައި ފާހަގަކުރައްވާފައެވެ.

ސުނާމީ ކާރިސާއަށް 20 އަހަރު ފުރުމާއި ގުޅުވައިގެން، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ފަރާތުން އިންތިޒާމުކުރައްވާފައިވާ މި މައުރަޒު ހުޅުވައިދެއްވައި، ނައިބު ވަނީ ކާރިސާގެ ވަގުތުގައި ދިވެހިން ދެއްކި އެއްބައިވަންތަކަމުގެ ނަމޫނާގެ ހަނދާން އާކުރައްވާފައެވެ. އަދި ސަލާމަތީ ބާރުތަކާއި، ދަރުމަވެރިންނާއި، އާންމު ރައްޔިތުން، އެކަކު އަނެކެއްގެ ކިބައިން ހިތްވަރު ނެރެ، ގައުމީ ހިދުމަތުގައި ވެދެއްވި ގުރުބާނީގެ އަގުވަޒަންކުރައްވާފައިވެއެވެ.

މި ރަސްމިއްޔާތުގައި ނައިބު ވަނީ ޑިސެމްބަރ 24 ވީ އަންގާރަ ދުވަހު، ނެޝަނަލް ޑިޒާސްޓަރ މެނޭޖްމަންޓް ކައުންސިލުން ފާސްކުރެއްވި "މޯލްޑިވްސް ޑިޒާސްޓަރ ރިސްކް ރިޑަކްޝަން ސްޓްރެޓަޖީ 2024-2030" ގެ ފޮތް ވެސް އިފުތިތާހުކޮށްދެއްވާފައެވެ. އަދި މި ރަސްމިއްޔާތުގައި ހުށަހެޅުއްވި އެއްބައިވަންތަކަމުގެ ދުވަހުގެ ހާއްސަ ލަވައެއް ވަނީ ބައްލަވާލައްވާފައެވެ.

ހަމަމިއާއެކު މައުރަޒު ބައްލަވާލައްވައި،"ފަނޑުވުމެއް ނެތް ހަނދާންތައް " ސެގްމެންޓްގައި ސުނާމީއާ ގުޅޭ ހާއްސަ މެސެޖެއް ވެސް ލިޔުއްވިއެވެ. އަދި މި މައުރަޒުގެ ފޮޓޯފޮތް އެމަނިކުފާނަށް ވަނީ އަރުވާފައެވެ.

ރާއްޖެއަށް ކުރިމަތިވި އެންމެ ނުރައްކާތެރި ކާރިސާ ހިނގާފައިވާކަމަށް ރެކޯޑުކުރެވިފައިވަނީ މީގެ 20 އަހަރު ކުރިން، ޑިސެމްބަރ 26 ވީ އާދީއްތަ ދުވަހު ހެނދުނު 9:18 ގައެވެ.