ގައުމީ ތަރައްގީގެ ޕްލޭން އެކުލަވާލުމަށް ރައްޔިތުންގެ ލަފާ ބޭނުން ކަމުގައި ހައުސިންގ މިނިސްޓަރ ޑރ. ޢަލީ ޙައިދަރު އަޙުމަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ގައުމީ ތަރައްގީގެ ޕްލޭން އެކުލަވާލުމުގެ މަސައްކަތް ފެށުމުގެ ގޮތުން ޒުވާނުންގެ މަރުކަޒުގައި ބޭއްވި ހާއްސަ ރަސްމިއްޔާތުގައި ވާހަކަދައްކަވަމުންނެވެ.

މިނިސްޓަރ ވިދާޅުވީ އެ ޕްލޭން އެކުލަވާލާނީ އެއް އަހަރު ދުވަހުގެ މުއްދަތެއްގެ ތެރޭގައި ކަމަށެވެ. އެހެންކަމުން އެ މުއްދަތުގެ ތެރޭގައި އެންމެ ފައިދާހުރި ޕްލޭނެއް އެކުލަވާލުމަށް ހުރިހާައި ރައްޔިތުންގެ ޝާމިލުވުން މުހިންމުވާނެކަމަށެވެ.

މީގެއިތުރުން އެއީ އިޖުތިމާއީ އިގްތިސާދީ ތަރައްގީއަށާއި، ތިމާވެށި ރައްކާތެރިކުރުމަށާއި، ދުނިޔޭގެ މޫސުމަށް އަންނަ ބަދަލުތަކުން ރާއްޖެއަށް ކުރާ ނޭދެވޭ އަސަރުތައް ކުޑަކުރުމަށް އަޅާނެ މުހިންމު ފިޔަވަޅުތައް ހިމެނޭނެ ޕްލޭނެއް ކަމަށް ވެސް ވަނީ ވިދާޅުވެފައެވެ.

ގައުމީ ތަރައްގީގެ ޕްލޭނެއް ހަދަން މަސައްކަތްފަށާއިރު، އެ ޕްލޭނަށް ގާނޫނުގެ ތެރެއިން ރައްކާތެރިކަން ދޭންޖެހޭނެ ކަމަށާއި އެހެންކަމުން އެކަން ކުރުމަށް ގާނޫނު އަސާސީއަށް މާއްދާއެއް އިތުރުކުރުމަށް ރައްޔިތުންގެ މަޖިލީހަށް ހުށަހަޅާނެކަމަށް ވެސް ވިދާޅުވިއެވެ.

20 އަހަރުގެ ދުރު ރާސްތާ ޕްލޭންއަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅާއި އެއްގޮތައް ރާއްޖޭގެ ހުރިހާ ރަށެއްގެ ކައުންސިލްތަކާއި ސިޔާސީ ޕާޓީތަކާއި އާއްމު ރައްޔިތުންގެ ބައިވެރިވުމާއި މަޝްވަރާ ހިމަނައިގެން ރައީސް ޑރ. މުހައްމަދު މުއިއްޒު ހާއްސަ ސަމާލުކަމެއް ދެއްވައިގެން ކުރިއަށްގެންދާ މަސައްކަތެކެވެ.