ކެންޑިޑެސީ ބާތިލު ކުރުމަށް ސުޕްރީމް ކޯޓުން ނިންމި ނިންމުމަކީ ރަނގަޅު ނިންމުމެއް ނޫން ކަމަށާއި އެކަން ގަބޫލު ނުކުރައްވާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރާއްޖެ ޓީވީގެ 'ފަށާއިރު' ޕްރޮގްރާމުގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ ދަށު ކޯޓުގެ ހުކުމްތަކަކީ މަތީ ދެ މަރުހަލާގައި އިސްތިއުނާފު ކުރެވޭ ކަންކަން ކަމަށާއި އިސްތިއުނާފުގެ އެއްވެސް މަރުހަލާއަކުން ވެސް އެމަނިކުފާނުގެ ކެންޑިޑެސީ ނުވަތަ ކުށްވެރިއެއް ކަމަށް ނިންމާފައި ނުވާ ކަމަށެވެ.

"އަޅުގަނޑުގެ އާރަށުގެ މައްސަލަ އިސްތިއުނާފު ކުރީ ހައިކޯޓުގައި، ހައިކޯޓުގައިވީ ކިހިނެއްތޯ. އަޅުގަނޑަށް ހައިކޯޓުގައި މައްސަލަ އަވަސް ކުރެވޭނެތޯ. ފަނޑިޔާރުންގެ އަތްމަތީގައި ދެއްތޯ އެ މައްސަލަ އޮތީ. ފަނޑިޔާރުން ނުނިންމަވާ ލަސްކުރެއްވީ ދެއްތޯ،" ރައީސް ޔާމީން ވިދާޅުވިއެވެ.

މީގެއިތުރުން ކެންޑިޑެސީ ސުޕްރީމް ކޯޓުން ބާތިލު ކުރުމަށްފަހު، ހައި ކޯޓުން ނިންމީ އެ މަނިކުފާނަކީ ކުށްވެރިއެއް ނޫންކަން ފާހަގަކުރައްވައި، ވަނީ އޭގެ ސަބަބުން އެ މަނިކުފާނާއި އެ މަނިކުފާނަށް ތާއީދު ކުރާ އެތައް ބައެއްގެ ހައްގުތައް ގެއްލިގެން ގޮސްފައިވާކަން ވެސް ފާހަގަކުރައްވާފައެވެ.