ހިއުމަން ރައިޓްސް ޑިފެންޑަރސް ޓްރެއިނިން ޕްރޮގްރާމް ނިމިއްޖެއެވެ.

މިއީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރުސީ.އެމް) އިން އިންސާނީ ހައްގުތަކަށް މަސައްކަތްކުރާ ފަރާތްތަކަށް އަމާޒުކޮށްގެން ހިންގި 4 ދުވަހުގެ ތަމްރީން ޕްރޮގްރާމެކެވެ.

ނޮވެމްބަރ 4 ން 7 ގެ ނިޔަލަށް ކުރިއަށް ގެންދިޔަ މި ޕްރޮގްރާމްގެ މައިގަނޑު މަގްސަދަކީ މުޖުތަމައުގައި އެއްބަޔަކު އަނެއްބަޔަކާ ގުޅިގެން، އިންސާނީ ހައްގުތަކަށް އާންމުން ހޭލުންތެރިކުރުވުމެވެ. އަދި ދައުލަތް ޖަވާބުދާރީކޮށް، އިންސާނީ ހައްގުތަކަށް ވަކާލާތުކުރާ ބައެއް ބިނާކުރުމެވެ.

މާލޭގައި ކުރިއަށް ގެންދިޔަ ހިއުމަން ރައިޓްސް ޑިފެންޑަރސް ޓްރެއިނިންގ ގެ ޕްރޮގްރާމުގައި 24 ފަރާތެއް ތަމްރީނުކުރެވިގެންދިޔައެވެ. މިއަހަރު މި ޓްރެއިނިންގ ކުރިއަށްގެންގޮސްފައިވަނީ ޓްރާސްޕޭރެންސީ މޯލްޑިވްސް (ޓީ އެމް) އަދި ޔޫއެސް އޭޖެންސީ ފޮ އިންޓަރނެޝަނަލް ޑިވެލޮޕްމެންޓް (ޔޫއެސްއެއިޑް) އެހީތެރިކަމާ އެކުގައެވެ.

ޕްރޮރާމް ނިމުމުގެ ރަސްމިއްޔާތު ކުރިއަށް ގޮސްފައިވަނީ 7 ނޮވެމްބަރުގައެވެ. ރަސްމިއްޔާތުގެ ޝަރަފުވެރި މެހެމާނެއްގޮތުގައި ޕްރޮސިކިއުޓަރ ޖެނެރަލް، ޖަސްޓިސް (ރިޓަޔަރޑް) އަލްއުސްތާޛު ޢައްބާސް ޝަރީފު ބައިވެރިވެވަޑައިގެންނެވިއެވެ.

ޔުނައިޓެޑް ނޭޝަންސް އޮފީސް އޮފް ދަ ހައި ކޮމިޝަނަރ ފޮރ ހިއުމަން ރައިޓްސް (OHCHR) އިން ހިއުމަން ރައިޓްސް ޑިފެންޑަރސް (އެޗް.އާރު.ޑީ) މާނަކުރަނީ މަދަނީ އަދި ސިޔާސީ ހައްގުތައް ރައްކާތެރިކޮށް ކުރިއެރުވުމާއި އިގްތިސާދީ، އިޖްތިމާއީ އަދި ސަގާފީ ހައްގުތައް ރައްކާތެރިކޮށް، އެ ހައްގުތައް ހޯދައިދިނުމަށް ސުލްހަވެރިގޮތެއްގައި މަސައްކަތްކުރާ ފަރުދުންގެ ގޮތުގައެވެ.

ހިއުމަން ރައިޓްސް ޑިފެންޑަރސް ވަކިވަކި ފަރުދުންގެ ނުވަތަ ޖަމާޢަތްތަކުގެ އެއްވެސް އިންސާނީ ޙައްޤެއް ގެއްލިފައިވާ ކަމުގައި ވަނީނަމަ އެޙައްޤެއް ހޯދައިދިނުމަށް މަސައްކަތްކުރާނެއެވެ.

މީގެކުރިން ހިއުމަން ރައިޓްސް ޑިފެންޑަރސް ޓްރެއިނިން ޕްރޮގްރާމެއް 2021ވަނަ އަހަރު ކުޅުދުއްފުށި ސިޓީގައި، އަދި 2023 ވަނަ އަހަރު ފުވައްމުލަކު ސިޓީގައި ކުރިއަށް ގެންގޮސްފައިވެއެވެ. 

މިފަދަ ޕްރޮގްރާމްތައް އިންތިޒާމް ކުރުމުގައި ކޮމިޝަނުގެ އުއްމީދަކީ ތަމްރީނުވާ ފަރާތްތަކަކީ މުޖުތަމައުގައި އެއްބަޔަކު އަނެއްބަޔަކާ ގުޅިގެން، އަދި ކޮމިޝަނާއި، ކަމާބެހޭ އެހެނިހެން އިދާރާތަކާ ގުޅިގެން އިންސާނީ ހައްގުތަކަށް އާންމުން ހޭލުންތެރިކޮށް، ހަވާސާވެފައިވާ ފަރާތްތައް ބާރުވެރިކުރުވައި، ދައުލަތް ޖަވާބުދާރީކޮށް، އިންސާނީ ހައްގުތަކަށް ވަކާލާތުކުރާ ބަޔަކަށް ވެގެންދިޔުމެވެ.