ހެޔޮއެދޭ ފަރާތަކުން ވީލްޗެއަރ އެސޯސިއޭޝަނަށް ލެޕްޓޮޕެއް ހަދިޔާކޮށްފިއެވެ.

'ފިޔަ' އޮންލައިންގެ ފަރާތުން މި ލެޕްޓޮޕް ހަދިޔާކޮށްފައިވަނީ ނޮވެމްބަރ 7 ވަނަ ދުވަހުއެވެ. މި ލެޕްޓޮޕާ އެ އެސޯސިއޭޝަންގެ ފަރާތުން ހަވާލުވެލެއްވީ ވީލްޗެއަރ އެސޯސިއޭޝަންގެ ފައުންޑަރ އަހުމަދު ނަޖީބު އެވެ.

ޔޫތު އެމްޕަވަމެންޓް އިންފޮމޭޝަން އެންޑް އާރޓްސް މިނިސްޓްރީގައި ރަޖިސްޓްރީކޮށްފައިވާ ވީލްޗެއަރ އެސޯސިއޭޝަނަކީ ރާއްޖޭގައި އުޅޭ ނުކުޅެދުންތެރިކަން ހުންނަ ހުރިހާ ފަރާތްތަކަށް އެކި ގޮތްގޮތުން އެހީތެރިކަމާއި އަޅާލުމާއި ހައްގުތައް ހޯދައިދިނުމަށް ވުޖޫދުކުރި އެސޯސިއޭޝަނެކެވެ.

ވާސޯ މެޑިކަލް ސެންޓަރ އާއި ގުޅިގެން މަސައްކަތްކުރާ މި ޖަމިއްޔާ އަކީ އަމިއްލަ ހާލަތަށް ހިނގާ އުޅުމުން މަހުރޫމް ވެފައިވާ, ވިލްޗެއަރ / ތިން ފުރޮޅުލީ ދުއްވާ އެއްޗެހީ ގައި އުޅޭ ފަރާތްތަކަށް ހާއްސަ ސަމާލު ކަމެއް ދޭ ޖަމުއިއްޔާ އެކެވެ.

އެހެންކަމުން މި ދެ ފަރާތްގުޅިގެން ނުކުޅެދުންތެރިކަން ހުންނަ ފަރާތްތަކަށް އެހީތެރިވުމުގެ ގޮތުން ދަނީ ވަރަށް ގިނަ ކަންތައް ތަކެއް ހިންގަމުންނެވެ. އެންމެ މުހިއްމު ކަމެއްގެ ގޮތުގައި އެފަދަ ބަލި ހާލަތުގެ ފަރާތްތަކަށް މިހާރުގެ ހާލަތުން އެއަށްވުރެ ރަނގަޅު ހާލަތަކަށް ގެންގޮސްދިނުން ހިމެނެއެވެ. އަދި ރާއްޖޭގެ ރަށް ރަށުގައި އުޅޭ މި ޖަމުއިއްޔާގައި ބައިވެރި ވެފައިވާ އެފަދަ ފަރާތްތަކަށް ވެސް އިސްކަމެއްދީގެން އެހީތެރިކަން ދަނީ ދެމުންނެވެ.

ނުކުޅެދުންތެރިކަން ހުންނަ ފަރާތްތައް, ޖެންޑަރ މިނިސްޓްރީ ގައި ދަފްތަރު ކުރެވި ކާޑު ލިބިފައިވާ ކޮންމެ ފަރާތަކަށް މި ޖަމުއިއްޔާ ގައި ބައިވެރި ވުމުގެ ދޮރު ވަނީ ހުޅުވިފައެވެ. ( މެސެޖު ކުރައްވާނީ: 9536610 ވައިބަރ އަށެވެ).

އެގޮތުން އާދައިގެ ވީލްޗެއަރ ގައި އުޅޭ ފަރާތްތަކުގެ ތެރެއިން މޯޓަރ ރިމޯޓް ވީލްޗެއަރ އެކަނި ދުއްވޭނެ ފަރާތްތަކަށް ދަސްކޮށްދީ، ވީލްޗެއަރ ހިލޭ އެހީގެ ގޮތުގައި ހޯދައިދިނުމަށް މަސައްކަތް ކޮށްދީ, އެންސްޕާ އިން ހޯދައި ދެވިފައި ވެއެވެ.

މިހައިތަނަށް މޯޓަރ ވީލްޗެއަރ ދުއްވަން ދަސްކޮށްދިން ފުރަތަމަ ބުރުވަނީ ހިންގައި, ދެ ފަރާތަކަށް ދަސްކޮށްދެވިފައެވެ. މީގެ ދެވަނަ ބުރު ހިންގުމަށް ހަމަޖެހިފައިވަނީ ޑިސެމްބަރ މަހުގެ ތެރޭގައެވެ.