އާސަންދަ ނިޒާމް ހަރުދާނަކުރުމަށް ގެންނަންޖެހޭ ބަދަލުތައް ގެނައުމުގެ މަސައްކަތް ސަރުކާރުން ދަނީކުރަމުން ކަމުގައި ހެލްތު މިނިސްޓަރ ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ހެލްތު އެކްސްޕޯ ހުޅުވުމަށް ނޮވެމްބަރ 7 ވަނަ ދުވަހުގެ ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

ހުޅުމާލޭ ސެންޓްރަލް ޕާކުގައި ބޭއްވި މި ރަސްމިއްޔާތުގައި އެންމެ ބޮޑު އިސްލާހެއްގެ ގޮތުގައި މިނިސްޓަރު ފާހަގަކުރެއްވީ އާސަންދަ ނިޒާމަކީ އެންމެ ބޭނުންޖެހިފައިވާ މީހުންނަށް އަމާޒުކުރެވިފައިވާ ހިދުމަތަކަށް ހެދުން ކަމަށެވެ.

މިގޮތުން ސަރުކާރުން މިހާރު ގެނެސްފައިވާ ބައެއް ބަދަލުތަކުގެ ތެރޭގައި ސިއްހީ ހިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއްނަމަ، އަދި އަމިއްލަ އިންޝުއަރެންސުން ކަވަރކުރާ ހިދުމަތެއްނަމަ ހިދުމަތްދިނުމުގައި އަމިއްލަ އިންޝިިއުރަންސްއަށް އިސްކަން ދިނުން ހިމެނޭކަން ފާހަގަކުރެއްވިއެވެ. އަދި އަމިއްލަ އިންޝުއަރެންސްގެ ދަށުން ނުލިބޭ ހިދުމަތްތައް އާސަންދައިން ލިބޭނަމަ، އެ ހިދުމަތެއް އާސަންދައިގެ ދަށުން ފޯރުކޮށްދިނުން ވެސް ގެނެސްފައިވާ އިސްލާހުގައިވާކަން ފާހަގަކުރެއްވިއެވެ.

އާސަންދަ ނިޒާމް އިސްލާހުކުރުމުގެ މަސައްކަތް ކުރަނީ ރައީސް ޑރ. މުޙައްމަދު މުޢިއްޒުގެ ބެއްލެވުމާއި އިރުޝާދުގެ ދަށުން ކަމަށާއި މި ނިޒާމު ވެގެންދާނީ ރައްޔިތުންނަށް އުއްމީދު ގެނެސްދޭ ނިޒާމަކަށް ކަމުގެ ޔަގީންކަން ވެސް މިނިސްޓަރު ވަނީ ދެއްވާފައެވެ.

އަމިއްލަ އިންޝުއަރެންސް ނުލިބޭ ހުރިހައި ހާލަތެއްގައި އާސަންދަ މެދުނުކެނޑި ލިބޭނެކަމަށް ވެސް ސަރުކާރުން ވިދާޅުވެއެވެ.