ރައްޔިތުންނަށްވީ ވައުދުތަކާ އެންމެއަވަހަށް ހިލާފުވީ މި ސަރުކާރުން ކަމުގައި ކުރީގެ ރައީސް ޢަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފް އިން ނޮވެމްބަރ 7 ވަނަ ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން އެމަނިކުފާނ ވަނީ މި ސަރުކާރުގައި ވައްކަމާއި ކޮރަޕްޝަން ވަނީ އިންތިހާއަށް ގޮސްފައި ކަމަށް ވެސް ތުހުމަތުކުރައްވާފައެވެ.

މީގެއިތުރުން އެމްޑީޕީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކޮށްފައިވާ ގޯއްޗާއި ފްލެޓުތައް ދިނުން ލަސްވާތީ ވެސް ރައީސް ޔާމީން ވަނީ ފާޑުވިދާޅުވެފައެެވެ.

އެގޮތުން އެމްޑީޕީ ސަރުކާރުން ދޫކުރި ފްލެޓާއި ބިންތައް އެއްވެސް ބަދަލެއް ނެތި ހަވާލުކުރައްވާނެ ކަމަށް ރައީސް ޑރ. މުހައްމަދު މުއިއްޒު މީގެ ކުރިން ވިދާޅުވެފައިވާ ކަމަށާއި އެހެންނަމަވެސް ފްލެޓްތަކާއި ބިންތައް އަލުން އިވެލުއޭޓްކުރުމަކީ ގާނޫނީ ގޮތުން ވެސް ކުރެވިގެންވާނެ ކަމެއް ނޫން ކަމަށް ވިދާޅުވިއެވެ.

އެއީ ސީދާ ކޮރަަޕްޝަނަށް މަގުފަހިވާފަދަ ކަންތައްކަމަށާއި ހާއްސަކޮށް އޭސީސީން ލިސްޓުގައި މައްސަލައެއް ނޫޅޭ ކަަމަށް ބުނުމުން އެގޮތަށް ދޫނުކޮށް ނުހިފެހެއްޓޭނެ ކަމަށް ރައީސް ޔާމީން ވިދާޅުވިއެވެ.

ފުލެޓުތައް ދޫކުރުމުގެ މަސައްކަތް ލަސްވާތީ ގިނަ ބަޔަކު ނުރުހުން ފާޅުކުރަމުން އަންނައިރު އެ މައްސަލައިގައި އެކި އިހުތިޖާޖުތައް ވެސް އަންނަނީ ބާއްވަމުންނެވެ.