"ހިޔާވަހި ފައިނޭންސިންގ ޕްރޮގްރާމް" ގައި ބައިވެރިވުމަށް ފޯމު ހުށަހެޅުމުގެ ފުރުސަތު ހުޅުވާލައިފިއެވެ.

މިއީ ގެދޮރު އިމާރާތްކުރުމުގައި ދިމާވާ މާލީ މައްސަލަތަކަށް ހައްލު ހޯދައިދިނުމަށް މި ސަރުކާރުން ފަށާފައިވާ ޕްރޮގްރާމެކެވެ.

މިކަން ހާމަކުރައްވައި، ހައުސިންގ މިނިސްޓްރީން ވިދާޅުވީ މި ޕްރޮގްރާމުގައި ބައިވެރިވުމަށް ހިޔާވަހި ޕޯޓަލްގެ ތެރެއިން ފޯމު ހުށަހެޅުމަށް އެދޭކަމަށެވެ. މި ޕްރޮގްރާމުގައި ބައިވެރިވުމަށް ހުޅުވާލާފައި ވަނީ އަތޮޅުތެރޭގެ ރަށްރަށާއި ސިޓީތައް އަދި މާލެ ސަރަހައްދެވެ.

އަތޮޅުތެރޭގެ ރަށްރަށުގައި ނަމަ، ގެދޮރު އިމާރާތްކުރުމަށް އެއްމިލިއަން ރުފިޔާއާ ހަމަޔަށް ލޯނު ދޫކުރުމަށް ނިންމާފައިވާއިރު، މި ލޯނުތައް ނަގާއިރު އެއްވެސް މިންވަރަކަށް އިކުއިޓީއެއް ބަހައްޓާކަށް ނުޖެހެއެވެ. އަދި ލޯނު އަނބުރާ ދެއްކުމުގެ މުއްދަތު 25 އަހަރާ ހަމަޔަށް ބަހާލެވޭގޮތަށް ވެސް ވަނީ ހަމަޖައްސަވާފައެވެ.

ސިޓީތަކުގައި ގެދޮރު އިމާރާތްކުރުމަށް ދޫކުރަނީ ތިން މިލިއަން ރުފިޔާއާ ހަމަޔަށެވެ. މި ގިންތިއަށް ފަސް ޕަސެންޓާ ދިހަ ޕަސެންޓާ ދެމެދުގެ އިކުއިޓީއެއް ދައްކަން ޖެހޭއިރު، މި ލޯނުތައް ވެސް އެންމެ ދިގުވެގެން 25 އަހަރަށް ބަހައިލެވެއެވެ.

މީގެއިތުރުން މާލެ ސަރަހައްދުގައި ގެދޮރު އިމާރާތްކުރުމަށް ހަ މިލިއަން ރުފިޔާއާ ހަމަޔަށް ލޯނު ދޫކުރާއިރު، މި ލޯނަށް ވެސް ފަސް ޕަސެންޓާ ދިހަ ޕަސެންޓާ ދެމެދުގެ އިކުއިޓީއެއް ދައްކަން ޖެހޭގޮތަށް ވަނީ ނިންމާފައެވެ. އަދި މި ލޯނު ވެސް 25 އަހަރަށް ބަހައިލެވެއެވެ.

ދިވެހި ސަރުކާރުން ވިދާޅުވެފައިވަނީ މިއީ ތާރީހުގައި ވެސް ގެދޮރުވެރިކަމަށް ދޫކުރެވޭ އެންމެ ހެޔޮ ލޯނު ކަމަށެވެ.

ސަރުކާރުގެ އަމާޒަކީ ގޯތި އޮވެ، ގެ އެޅޭނޭ ގޮތް ނެތް މީހުންނާއި ގެ އަޅަން ފެށުމަށްފަހު މަސައްކަތް ހުއްޓާލަން ޖެހިފައިވާ މީހުންނާއި އިމާރާތް ބާވެ، މަރާމާތުކުރަން ބޭނުންވެފައިތިބި މީހުންގެ ތަކުލީފުތަކަށް ލުޔެއް ހޯދައިދިނުމެވެ.

ރައީސް ޑރ. މުހައްމަދު މުއިއްޒު ވިދާޅުވީ، 2025 ވަނަ އަހަރަށް ސަރުކާރުން ހުށަހަޅުއްވާފައިވާ ބަޖެޓުގައި މި ސްކީމަށް އެއް ބިލިޔަން ރުފިޔާ ހިމަނުއްވާފައިވާނޭ ކަމަށެވެ. އަދި ކުރިއަށްއޮތް ހަތަރު އަހަރުގެ ބަޖެޓުގައި ވެސް މި މަސައްކަތަށް އެ އަދަދު ހިމަނުއްވާނޭކަމަށެވެ.