ކައިވެންޏާއި ވަރިއަކީ އެ ކަންކަމުގައި ސަމާސާކުރުން ހިމެނޭ ކަންކަމެއް ނޫންކަން ހުކުރު ހުތުބާގައި ހަނދާންކޮށްދީފިއެވެ.

"ވަރިކުރުމާއި ޢިއްދާއާ ބެހޭ ޙުކުމްތައް" މި މައުޟޫއަށް ތައްޔާރުކޮށްފައިވާ ހުތުބާގައި ވަނީ ޝަރުއީ ސަބަބަކާ ލައިގެން މެނުވީ، އަނބިން، އެ ކަނބަލުންގެ ފިރީންގެ ގާތުން ވަރިވާން އެދުމަކީ އިސްލާމްދީނުގައި ނަހީކުރައްވައިފައިވާ ކަމެއް ކަމަށެވެ. އަދި އެފަދަ އަންހެނުންނަށް ސުވަރުގޭގެ 'ވަސް' ވެސް ހަރާމްވާނެ ކަމަށެވެ.

މީގެއިތުރުން ދެމަފިރިއެއްގެ ދެމެދުގައި އުފެދޭ އަރައިރުން، ވަރިއާ ހަމައަށް ދިއުމުގެ ކުރީން އެ އަރައިރުން ހައްލުކުރެވޭނެ ގޮތެއް އޮތްތޯ ބެލުމަށް، ދެ ފަރާތުން ފޮނުވާ ނިޔާވެރީންގެ ނިންމުމާއި އެއްގޮތަށް ޢަމަލުކުރަންޖެހޭނެކަން ހުތުބާގައި ހަނދާންކޮށްދިނެވެ.

ހުތުބާގައި އިތުރަށް ބުނީ ވަރިކުރުން ހުއްދަވާ ސަބަބުތަކުގެ ތެރޭގައި އަނބިމީހާގެ އަޚްލާގު ނުބައިވުމާއި، ޒަވާޖީ ހަޔާތުގެ އިންތަކުން ބޭރުވުމާއި، ﷲގެ އަމުރުފުޅުތަކަށް ފަރުވާ ކުޑަކުރުން ހިމެނޭކަމަށެވެ. އަދި ﷲ އެންގެވި އިމުގެ ތެރޭގައި ދެމަފިރީންނަށް ޒަވާޖީ ހަޔާތް ވޭތުނުކުރެވޭނެކަން ކަށަވަރުވެއްޖެ ނަމަ، އެންމެ ރަނގަޅު ގޮތަކީ ވަރިވުންކަމަށް ހުތުބާގައި ބުންޏެވެ.

ފިރިމީހާ އަނބިމީހާގެ މައްޗަށް އަނިޔާވެރިވެ، އޭނާގެ ހައްގުތައް އަދާނުކުރާ ނަމަ، އަނބިމީހާއަށް ކައިވެނި ޚުލްޢުކުރުމަށް ހުށަހެޅުން ހުއްދަވާނެ ކަމަށާއި، އެ ފަދަ ހާލަތެއްގައި ފިރިމީހާ އޭނާއަށް ދިން ކައިވެނީގެ ރަން އަނބުރައި ދޭން ޖެހޭނެކަމަށް ވެސް ހުތުބާގައި ވަނީ ބުނެފައެވެ.

ކައިވެންޏާއި ވަރީގެ ޝަރުއީ ހުކުމްތަކެއް ކަނޑައެޅިފައިވާއިރު، އެ ކަންކަން ބެލެހެއްޓުމާއި އާއިލާތަކުގެ ހައްގުތައް ރައްކާތެރިކުރުމަށްޓަކައި ދައުލަތުން ހަދައިފައިވާ ގާނޫނުތަކާއި ގަވާއިދުތަކަށް ހުރުމަތްތެރިކޮށް ހިތުމަށް ހުތުބާގައި ނަސޭހަތްތެރިވިއެވެ.