ޗައިނާގެ ޑޮކްޓަރުން ކުރިއަށްގެންދާ އައި ކޭމްޕަށް ހެލްތު މިނިސްޓަރު ޢަބްދުﷲ ނާޒިމް އިބްރާހިމް ޒިޔާރަތްކުރައްވައިފިއެވެ.

އެމަނިކުފާނުގެ އަރިހުގައި އެގައުމުން ރާއްޖެއަށް ކަނޑައަޅުއްވާފައިހުންނަވާ ސަފީރު ވަންގް ލިޒިން ވެސް ބައިވެރިވެވަޑައިގެންނެވިއެވެ.

ޗައިނާ ސަފީރު 'އެކްސް' ގައި ކުރައްވާފައިވާ ޕޯސްޓެއްގައި ވިދާޅުވީ ތިން ދުވަހުން ގާތްގަނޑަކަށް 60 ސާޖަރީ ފުރިހަމަ ކޮށްފައި ވާކަމަށެވެ. އަދި މިކަމަށްޓަކައި ޕޭޝަންޓުން ޝުކުރެވިރިވާ ކަމަށެވެ.

މިނިސްޓަރާއި ސަފީރު ވަނީ ހުޅުމާލެ ހޮސްޕިޓަލުގެ މެނޭޖްމަންޓާ ވެސް ބައްދަލު ކުރައްވާފައެވެ. މި ބައްދަލުކުރެއްވުމުގައި ލޮލުގެ ހިދުމަތް ރަނގަޅުކުރުމަށް ގުޅިގެން ކުރެވޭނީ ކޮން ކަންތައްތަކެއްތޯ މަޝްވަރާކުރައްވާފައި ވެއެވެ.

މި ކޭމްޕްގެ ކާމިޔާބީ ފާހަގަކުރައްވައި، ސަފީރު ވަންގް ލިޒިން ވަނީ ކުރިއަށް އޮތް އަހަރުތަކުގައި ވެސް މިފަދަ ކޭމްޕްތައް ކުރިއަށް ގެންދިއުމުގެ މުހިންމުކަމުގެ މައްޗަށް އަލިއަޅުއްވާފައެވެ.

މި ކޭމްޕްގައި ބަލާނީ ލޮލުގެ ސާރޖަރީ ކުރުމަށް ކުރިން ނަން ނޯޓުކޮށްފައިވާ މީހުން ކަމަށް ހުޅުމާލެ ހޮސްޕިޓަލުން މައުލޫމާތު ދެއެވެ.