ރާއްޖޭގެ އެކި ކަންކޮޅުތަކުގައި ޑިވެލޮޕްމަންޓް ޒޯންތަކާއި އަރބަން ސެންޓަރުތައް ތަރައްގީކުރުމަކީ ފެށުނީއްސުރެ މި ސަރުކާރުން ގެންގުޅުއްވާ ސިޔާސަތެއް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނުގެ ރަސްމީ 'އެކްސް' އެކައުންޓުން ނޮވެމްބަރ 9 ވަނަ ދުވަހު ކުރެއްވި ޕޯސްޓެއްގައި ވަނީ ދިވެހީންގެ ރާއްޖެ މެނިފެސްޓޯގެ 4 ވަނަ ބާބުގެ 12، 13 އަދި 14 ވަނަ ނަންބަރުގައި ހިމެނޭ ރާއްޖޭގެ ދެމެހެއްޓެނިވި ތަރައްގީއާބެހޭގޮތުން މެނިފެސްޓޯގައި ހިމެނޭ މައުލޫމާތުތައް ހިއްސާކުރައްވާފައެވެ.

އެގޮތުން ރާއްޖޭގެ ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އަރބަން ރީޖަންގެ އިތުރުން އެންމެ މަތީ ފަންތީގެ ހިދުމަތްތަކާއެކު، އެންމެ އުތުރުގެ ތިން އަތޮޅު ހިމެނޭހެން ނޮދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި، އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްގީކުރުމަށް މެނިފެސްޓޯގައި ހިމަނުއްވާފައިވާނެ ކަމުގައި ވިދާޅުވެފައިވެއެވެ.

މީގެއިތުރަށް މާލެއިން އުތުރުގައި އާރބަން ތިން ސެންޓަރާއި މާލެއިން ދެކުނުގައި އާރބަން ހަތަރު ސެންޓަރު ހިމެނޭހެން ޖުމުލަ 7 އަރބަން ސެންޓަރު ތަރައްގީކުރެއްވުމަކީ ސަރުކާރުގެ ސިޔާސަތުކަން ވަރަށް ސާފުކޮށް މެނިފެސްޓޯގައި ބަޔާންކުރައްވާފައި ވާނޭކަމުގައި ވިދާޅުވެފައިވެއެވެ. އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި އެމަނިކުފާނު އެކަން ތަކުރާރުކުރައްވާފައި ވާނޭކަމުގައި ވެސް އެ ޕޯސްޓުގައި ފާހަގަކުރައްވާފައިވެއެވެ.

މިއީ ކުރިއަށްއޮތް 20 އަހަރު ދުވަހަށް އެކަށައަޅުއްވަން މަސައްކަތް ފަށްޓަވާފައިވާ ތަރައްގީގެ މާސްޓަރޕްލޭންގައި ހިމެނުއްވުމަށް ގަސްދުކުރައްވާ ކަންތައްތަކެއް ކަމަށާއި އެ ކަންކަން އެކަށައަޅުއްވާނީ ފަންނީ ފަރާތްތަކާއި ކައުންސިލްތަކާއި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލު ވެސް ހިމެނޭގޮތަށް ކަމާބެހޭ ހުރިހާ ފަރާތްތަކެއްގެ ބައިވެރިވުމާ އެކުގައިކަމަށް ވެސް އެމަނިކުފާނު ވަނީ ވިދާޅުވެފައެވެ.

ދިވެހީންގެ ރާއްޖެ މެނިފެސްޓޯގެ 4 ވަނަ ބާބު (ގެދޮރުވެރިކަމާއި އަރބަނައިޒޭޝަން) ގެ ނަންބަރު 4.12 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ހއ. އަތޮޅާއި، ހދ، އަތޮޅު އަދި ށ. އަތޮޅު ހިމެނޭ އުތުރުގެ ތަރައްގީ ޒޯނުގައި، އިދާރީ މައި ހަބުގެ ގޮތުގައި ހދ. ކުޅުދުއްފުށި ހިމަނައިގެން، ބައިނަލްއަޤުވާމީ ދޮރޯއްޓެއްގެ ގޮތުގައި ހދ. ހަނިމާދޫ ގާއިމުކޮށް، ހއ. އިހަވަންދިއްޕޮޅުގައި ބައިނަލްއަގްވާމީ ޓްރާންސްޝިޕްމަންޓް ބަނދަރެއް ގާއިމުކުރުމުގެ ތަސައްވުރެކެވެ.

ހަމަ މި ބާބުގެ 4.13 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ހިދުމަތް ލިބޭ ސަރަހައްދެއްގެ ގޮތުގައި ގއ. އަތޮޅާއި، ގދ، އަތޮޅު އަދި ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްގީ ޒޯނުގައި، އިދާރީ މައި ހަބުގެ ގޮތުގައްޔާއި ބައިނަލްއަގްވާމީ ދޮރޯއްޓެއްގެ ގޮތުގައި އައްޑޫ ސިޓީ ހިމަނައިގެން، ބައިނަލްއަގްވާމީ ޓްރާންސްޝިޕްމަންޓް ބަނދަރަކާއި ސިނާއީ މަސައްކަތްތަކާއި، މަސްވެރިކަމާއި، ދަނޑުވެރިކަމާއި، މެރިކަލްޗަރާއި ފަތުރުވެރިކަމުގެ ވަސީލަތްތައް ފުޅާކޮށް، ތަރައްގީކުރުމުގެ ތަސައްވުރެކެވެ.

ހަމަ މި ބާބުގެ 4.14 ގައި ވަނީ، މެދުމިނުގެ އިތުރު 7 އަރބަން ސެންޓަރު (މާލެއިން އުތުރުގައި 3 އަދި ދެކުނުގައި 4 ހިމެނޭގޮތަށް) ތަރައްގީކުރުމުގެ ތަސައްވުރެކެވެ.