އަރބަން ސެންޓަރގެ ގޮތުގައި ރަށްތަކެއް ކަނޑައެޅުމުގެ މަގްސަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަންފެށުން ކަމުގައިވެގެން ނުވާނެ ކަމުގައި އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅާ އެއްގޮތަށް އަރބަން ސެންޓަރުތައް ގާއިމުކުރާ ރަށްތައް އިއުލާންކުރުމުން އެކަމަށް އިޝާރާތް ކުރައްވައެވެ.

އެމްޑީޕީ ސަރުކާރުގައި ފޮރިން މިނިސްޓަރުގެ މަގާމު ވެސް އަދާކުރެއްވި ޝާހިދު ވިދާޅުވީ އަރބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެސަރަހައްދުތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށެވެ.

މީގެއިތުރުން މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައިދެކެވަޑައިގަންނަވާ ކަމަށް ވެސް ވަނީ ވިދާޅުވެފައެވެ.

އަރބަން ސެންޓަރުތަކުގެ ގޮތުގައި ތަރައްގީ ކުރަން ރައީސް ކަނޑައަޅުއްވާފައިވާ ރަށްތަކުގެ ލިސްޓުގައި ވަނީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ އެވެ. އަދި ފ. ނިލަންދޫ، ދ. ކުޑަހުވަދޫ އާއި ލ. ފޮނަދޫ ވެސް ހިމެނެއެވެ.

ރައީސް ޑރ. މުއިއްޒު މީގެ ކުރިން ވިދާޅުވެފައިވަނީ މި އަރބަން ސެންޓަރުގެ އިތުރުން ރާއްޖޭގެ އުތުރާއި ދެކުނުގައި އިންޓަގްރޭޓެޑް ޑިވެލޮޕްމަންޓް ޒޯނުގެ ދެ ޒޯނެއް ވެސް ތަރައްގީ ކުރައްވާނެ ކަމަށެވެ. އޭގެ ބޭނުމަކީ ރާއްޖޭގެ އެކި ސަރަހައްދުތަަކަށް ތަރައްގީ އާއި ރަށްވެހިކަމުގެ މަންދާ ބެހިފައިވާ ގޮތަކަށް ކުރިއަށް ދިޔުން ކަމަށް ރައީސް ވަނީ ވިދާޅުވެފައިވެއެވެ.