މެރިކަލްޗަރ ވަކި ސިނާތެއްގެ ގޮތުގައި ތަރައްގީކުރެވޭނެކަމުގެ ޔަގީންކަން އެބައޮތް ކަމުގައި ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެއެވެ.

ބޭސިކް މެރިކަލްޗަރ ކޯހުގެ ދެވަނަ ބެޗް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން އެމަނިކުފާނު ވަނީ ރާއްޖޭގައި މެރިކަލްޗަރ ތަރައްގީކުރުމަށް ހަތަރު ސަރަހައްދެއް ވަޒީރުންގެ މަޖިލީހުން ކަނޑައަޅުއްވާފައިވާކަން ހާމަކުރައްވާފައެވެ. އެއީ ބޮޑު ތިލަދުންމައްޗާއި، ރ. އަތޮޅާއި މ. އަތޮޅުގެ އަދި ތ. އަތޮޅުކަން ފާހަގަކުރެއްވިއެވެ.

މީގެއިތުރުން މަނިޔަފުއްޓާއި ގާތްގަނޑަކަށް ދެ ކިލޯމީޓަރު ދުރުގައި އޮތް ފަޅެއް ވެސް މިކަމަށް ކަނޑައަޅާފައިވާކަމަށް ވިދާޅުވިއެވެ.

މިނިސްޓަރު ވިދާޅުވީ މިހާރު ކުރަމުންދަނީ އެސަރަހައްދުތަކުގައި މެރިކަލްޗަރގެ މަސައްކަތް ކުރަން ބޭނުންވާ ގަވާއިދުތައް އެކުލަވާލުމުގެ މަސައްކަތް ކަމަށާއި މިކަމަށް ހުޅުވާލުމަށް ތައްޔާރުވަމުންދާއިރު، މިކަމަށް ބޭނުންވާ އުސޫލުތަކާއި ގަވާއިދުތައް އެކުލަވާލުމުގެ މަސައްކަތް ވެސް ކުރަމުން އަންނަކަމަށް ވަނީ ވިދާޅުވެފައެވެ.

ސަރުކާރުން ނިންމަވާފައިވަނީ މިމަސައްކަތް ކުރުމަށް ރަސްމީކޮށް ކަނޑައަޅާފައިވާ ހަތަރު ސަރަހައްދުން ނަގާ ބިމަށް ލޭންޑް އެކުއިޒިޝަނަށް ފައިސާ ނުނަގާގޮތަށެވެ. އަދި ފުރަތަމަ ތިން އަހަރުގެ ބިމު ކުލި ވެސް ނުނެގުމަށްވަނީ ނިންމަވާފައެވެ.

މީގެއިތުރުން މިމަސައްކަތަށް ބޭނުންވާ ވަސީލަތް ރާއްޖެ އެތެރެކުރުމަށް ޑިއުޓީ މާފުކުރުމަށް ވެސް ވަނީ ހަމަޖައްސަވާފައެވެ.