އިސްރާއީލު ޕާސްޕޯޓު މަނާކުރުމުގެ މަސައްކަތް އަވަސްކުރުމުގެ މަސައްކަތް ފަށައިފިއެވެ.

އެގައުމުގެ ޕާސްޕޯޓު މަނާކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް ވީހާވެސް އަވަހަށް ނިންމުމަށް މަސައްކަތް ފަށައި، ބިލުގެ މަސައްކަތް ސަލާމަތީ ހިދުމަތްތަކާބެހޭ ކޮމިޓީ ނުވަތަ 241 ކޮމިޓީބަލަން ނިންމާފައިވާއިރު، މި ބިލާ ގުޅިގެން ބާއްވާ އެ ކޮމިޓީގެ ފުރަތަމަ ބައްދަލުވުން ތާވަލްކޮށްފައިވަނީ އަންގާރަ ދުވަހު ހެނދުނު 9:30 އަށެވެ.

މިކަމާއިގުޅިގެން ސަލާމަތީ ޚިދުމަތްތަކާ ބެހޭ ކޮމިޓީގެ މުޤައްރިރުގެ ނާއިބު އިނގުރައިދޫ ދާއިރާގެ މެންބަރު އިބްރާހީމް ފަލާހު ޕީއެސްއެމް އަށް ވިދާޅުވެފައިވަނީ ކޮމިޓީ މަރުހަލާގައި މި ބިލު ދިރާސާ ކުރުމަށް ފަހު، ކަމާއިގުޅުންހުރި އިދާރާތަކުގެ ލަފަޔާ މަޝްވަރާ ހޯއްދަވާނެ ކަމަށެވެ. އަދި މަސައްކަތް ކުރާނީ ވީހާ ވެސް އަވަހަށް ބިލުގެ މަސައްކަތް ނިންމުމަށް ކަމަށެވެ.

އޭނާ ވިދާޅުވީ ފުރަތަމަ އޮންނާނީ ބިލުގެ ސުންގަޑި ކަނޑައެޅުން ކަމަށާއި ކަމާ ގުޅުން ހުރި ފަރާތްތަކަށް ކޮމެންޓް ފޮނުވާނެ ކަމަށެވެ. އަދި ކޮމިޓީ މަރުހަލާގައި ކަމާ ގުޅުން ހުރި މީހުން ގެނެސް ލަފަޔާ އިރުޝާދާއި މަޝްވަރާ ވެސް ހޯދާނެ ކަަމަށް ފަލާހު ވަނީ ވިދާޅުވެފައެވެ.

ފަލަސްތީނުގެ ދަރިފަސްކޮޅު ނައްތާލުމަށް އިޒްރޭލުން ހިންގަމުންދާ ގަތުލުއާންމާއި ދެކޮޅު ހެދުމުގެ ގޮތުން ޔަހޫދީ އިސްރާއީލުގެ ޕާސްޕޯޓު މަނާ ކުރުމުގެ ބިލު މަޖިލީހަށް ހުށައެޅީ މިއަހަރުގެ ޖޫން މަހުގެ ކުރީކޮޅުގައެވެ.