ޕާކިސްތާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކްސެލެންސީ ވައިސް އެޑްމިރަލް ރިޓެއަރޑް މުހައްމަދު ފައްޔާޒު ގިލާނީ ގެ ހިފެހެއްޓުމެއް ނެތް ޝުކުރު ދިވެހި ރައްޔިތުންނާއި ސަރުކާރަށް ރައްދުކުރައްވައިފިއެވެ.

ސަފީރުކަމުގެ ދައުރު ހަމަކުރައްވައި، ރާއްޖެއިން ފުރާވަޑައިގަތުމުގެ ކުރީން އާންމުކުރެއްވި ވީޑިއޯ މެސެޖެއްގައި އެމަނިކުފާނު ވިދާޅުވީ ދައުރު ހަމަކުރައްވައި، ރާއްޖެއިން ފުރާވަޑައިގަންނަވަނީ ހިތްހަމަޖެހުމާއެކުގައި ކަމަށެވެ. އަދި ރާއްޖޭގައި މަސައްކަތްކުރަން ލިބުމަކީ ލިބުނު ވަރަށްބޮޑު އުފާވެރިކަމެއް ކަމަށެވެ.

ހާއްސަކޮށް ދިވެހީންގެ ހިތްހެޔޮކަން ފާހަގަކުރައްވައި، ވިދާޅުވީ އެމަނިކުފާނުގެ ސަފީރުކަމުގެ ދައުރުގައި ދެގައުމުގެ އެކިފަރާތްތަކުން ލިބުނު އެއްބާރުލުމަށް ޝުކުރުއަދާކުރައްވާ ކަމަށެވެ.

މީގެއިތުރުން ދެގައުމުގެ ގުޅުން މުސްތަގުބަލުގައި މިހާރަށްވުރެ، ފުޅާވާނެކަމަށް އުއްމީދުކުރައްވާ ކަމަށް ވެސް ވިދާޅުވިއެވެ.

އެމަނިކުފާނުގެ ސަފީރުކަމުގެ ދައުރުގައި ޕާކިސްތާނުން ވަނީ އެކި ރޮނގުތަކުން އެހީތެރިކަން ފޯރުކޮށްދެއްވާފައެވެ.

ހާއްސަކޮށް ރާއްޖޭގެ ސްކޫލުތައް ޑިޖިޓަލައިޒް ކުރުމަށް ސަރުކާރުން ކުރިއަށްގެންދާ މަޝްރޫއުގެ ދަށުން ރާއްޖޭގެ އެކި ސްކޫލުތަކަށް ވަނީ އެހީތެރިކަން ފޯރުކޮށްދެއްވާފައެވެ. އަދި ނުކުޅެދުންތެރިކަން ހުންނަ ފަރާތްތަކަށް ޕާކިސްތާނުން ފުރުސަތު ހޯދައިދިނުމުގެ މަޝްވަރާތަކެއް ވެސް ވަނީ ކުރައްވާފައެވެ.