ރާއްޖެއަށް މިއަހަރު އައި ދެމިލިއަން ވަނަ ފަތުރުވެރިޔަ އަށް ވެލާނާ އިންޓަރނޭޝަނަލް އެއަރޕޯޓުން ހޫނު މަރުހަބާއެއް ކިޔައިފިއެވެ.

އޮސްޓުރިއާގެ މި ފަތުރުވެރިޔާ އަށް މަރުހަބާ ކިޔުމަށް ވީއައިއޭ ގައި ބޭއްވި ހާއްސަ ރަސްމިއްޔާތުގައި ޓޫރިޒަމް މިނިސްޓަރ އިބްރާހިމް ފައިސަލާއި، އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހީމް ޝިއުރީއާއި، އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު، ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދު އަދި އިމިގްރޭޝަންގެ އިސްވެރިން ބައިވެރިވެވަޑައިގެންނެވިއެވެ.

ތަފާސްހިސާބަށް ބަލާއިރު، މިއަހަރުގެ ފެބްރުއަރީ މަހު ވަނީ ރާއްޖެއަށް ރެކޯޑު އަދަދަކަށް ފަތުރުވެރިން ޒިޔާރަތްކޮށްފައެވެ. އެގޮތުން އެ މަހު ދެ ލައްކަ ފަތުރުވެރިން ޒިޔާރަތްކޮށްފައި ވެއެވެ.

ސަރުކާރުން މިއަހަރަށް ކަނޑައަޅުއްވާފައިވާ އަމާޒަކީ ރާއްޖެއަށް ދެ މިލިއަން ފަތުރުވެރިން ގެނައެމެވެ. އެހެންކަމުން މިހާރުމިވަނީ އެ އަމާޒު ހާސިލުކުރެވިފައެވެ.

އަންނަ އަހަރަށް ސަރުކާރުން ކަނޑައަޅުއްވަފައިވަނީ 2.2 މިލިޔަން ފަތުރުވެރިން ރާއްޖެއަށް ގެނައުމެވެ.