މިއަދާ ހަމައަށް މަސްވެރިންނަށް ނުދެވިހުރި ފައިސާގެ ޖުމުލަ ޢަދަދު، މިހާރު ވާނީ މިފްކޯއާ ޙަވާލުކުރައްވާފައިކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ. 

އެމަނިކުފާނު މިކަން ހާމަކުރެއްވީ އެމަނިކުފާނުގެ ރަސްމީ "އެކްސް" އެކައުންޓުން މިއަދު ކުރެއްވި ޕޯސްޓެއްގައެވެ.

މަސްވެރިންގެ ކަންބޮޑުވުންތަކަށް އަމާޒުކުރައްވައި، ކުރައްވާފައިވާ މި ޕޯސްޓުގައި އެ މަނިކުފާނު ވަނީ، ދިވެހީންގެ ރާއްޖެ މެނިފެސްޓޯގައިވާ ފަދައިން، 48 ގަޑި އިރު ތެރޭގައި ދެމެހެއްޓެނިވި ގޮތެއްގައި މަސްވެރިންނަށް ފައިސާ ދެވޭނޭ ނިޒާމު ޤާއިމު ކުރެއްވުމުގެ މަސައްކަތް ކުރިއަށްދާކަމުގައި ވެސް ވިދާޅުވެފައެވެ.

މަސްވެރިން މަސް ކިރާ ވަގުތުން ފެށިގެން އެންމެ ލަސްވެގެން 48 ގަޑިއިރު ތެރޭގައި މަސްވެރިޔާއަށް ފައިސާ ލިބޭނޭ އިންތިޒާމު ހަމަޖެއްސުމަކީ، ދިވެހީންގެ ރާއްޖެ މެނިފެސްޓޯގެ މުހިންމު އަމާޒެކެވެ.