ރާއްޖެ އެތެރެކުރަން އުޅުނު 5 މިލިއަނަށްވުރެ ގިނަ ރުފިޔާގެ މަސްތުވާތަކެތި ކަސްޓަމްސް އިން އަތުލައިގަނެފިއެވެ.

މޯލްޑިވްސް ކަސްޓަމްސް ސަރވިސް އިން ވިދާޅުވީ ވައިގެމަގުން ރާއްޖެ އެތެރެކުރަން އުޅުނު 2.4 ކިލޯގެ މަސްތުވާތަކެތި އަތުލައިގަނެފައިވާ ކަމަށެވެ. އަދި މިއީ ޑިސެމްބަރ 26 ވަނަ ދުވަހު ތައިލޭންޑުން ރާއްޖެއައި ދެ މީހެއްގެ އަތުން އަތުލައިގަތް ތަކެތި ކަަމަށެވެ.

އުމުރުން 41 އަހަރާއި 21 އަހަރުގެ ދިވެހި ދެ ފިރިހެން ފަސިންޖަރުންގެ ޢަމަލުތައް ހުރިގޮތުން އެ ފަސިންޖަރުންނާއި މެދު ޝައްކުކުރެވިގެން އިތުރަށް ބަލައި ފާސްކުރުމުގެތެރޭގައި ދެ ފަސިންޖަރުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓާ ފެނިފައިވާކަމަށް ކަސްޓަމްސް އިން ވިދާޅުވިއެވެ.

ފުރަތަމަ މަރުހަލާގައި ކަސްޓަމްސް އިން މި ތަކެތި ތަޙުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ ހެރޮއިން (Heroin – 0.32 kg) އަދި މެފެޑްރޯން(Mephedrone – 2.1 kg) އަށް ވަނީ ޕޮޒިޓިވް ވެފައިވާކަމަށް ވިދާޅުވިއެވެ.

އެ އިދާރާ އިން ވިދާޅުވީ މިތަކެތީގެ ބަރުދަނުގައި ޕެކިންގއާއި އެކު ޖުމްލަ 2.4 ކިލޯ ހުރިއިރު، މިތަކެތީގެ މަގުމަތީ އަގަކީ ގާތްގަނޑަކަން 5.5 މިލިއަން ދިވެހި ރުފިޔާކަމަށް ލަފާކުރެވޭ ކަމަށެވެ.

މި މައްސަލަ އިތުރަށް ތަހްގީގުކުރުމަށްޓަކައި، މައްސަލައިގައި އަތުލައިގަނެވުނު މަސްތުވާތަކެއްޗާއި މައްސަލައިގައި ޝާމިލްވާ ދެ ފަސިންޖަރުން ދިވެހި ފުލުހުންގެ ހިދުމަތާ ހަަވާލުކޮށްފައިވާކަމަށް ކަސްޓަމްސް އިން ވިދާޅުވެއެވެ.