އެމްޑީޕީ މެމްބަރުން ޕީއެންސީގެ ދަފްތަރުގަި ޖައްސާކަމުގެ ޝަކުވާ އެމްޑީޕީން އަނެއްކާ ވެސް ކޮށްފިއެވެ.

މިކަމާއިގުޅިގެން އެމްޑީޕީން ނެރުނު ބަޔާނެއްގައި ބުނީ އެ ޕާޓީގެ ގައުމީ މަޖިލީހުގެ މެމްބަރުން ވެސް ޕީއެންސީގެ ހިމަނާފައިވާ ކަމަށެވެ. އަދި އެ މައްސަލަ އެންމެ ހަރުކަށި އިބާރާތުން ކުށްވެރިކުރާކަމަށެވެ.

މީގެއިތުރުން އެ ޕާޓީން ވަނީ އެހެނިހެން ބައެއް ޕާޓީތަކުގެ ދަފްތަރުގައި ވެސް އެމްޑީޕީގެ މެމްބަރުން ހިމަނާފައިވާކަން ފާހަގަކޮށްފައެވެ. އަދި މި މައްސަލަތައް ބަލައިދިނުމަށް އިލެކްޝަންސް ކޮމިޝަނަށް ރަސްމީކޮށް ހުށަހަޅާނެ ކަމަށް ވެސް ބުނެފައި ވެއެެވެ.

އެމްޑީޕީން ބުނީ ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ޕީއެންސީއަށް އެއް ލައްކަ މެމްބަރުން ހަމަކުރަން ކަމަށް ބުނެ މީހުންގެ ސޮއި ފޯޖުކޮށްގެން އިލެކްޝަންސް ކޮމިޝަނަށް ފޯމު ހުށަހަޅާފައިވާކަން މިކަމުން އެނގިގެންދާ ކަމަށެވެ. އަދި ދައުލަތުގެ ހުރިހައި އިދާރާއަކަށް ނުފޫޒު ފޯރުވައި މިކަން ފޮރުވުމަށް ސަރުކާރުން މަސައްކަތް ކުރަމުންދާ ކަމަށް ވެސް ބުނެފައި ވެއެވެ.

ސިޔާސީ ޕާޓީތަކަށް މީހުން ވެއްދުމާއި ވަކިކުރުމަށް މިހާރު ކަނޑައަޅާފައިވާ އުސޫލުތަކާއި އިޖުރާއަތްތައް އިތުރަށް ހަރުދަނާކުރުމަށާއި ވަގު ފޯމު ފުރައިގެން ޕީއެންސީގެ ދަފްތަރަށް މީހުން އިތުރުކުރަން ހުރި ދޮރުތައް ބަންދުކުރުމަށް އެމްޑީޕީން ވަނީ އީސީ އަށް ގޮވާލާފައެވެ.