އިގްތިސާދީ އިސްލާހީ އެޖެންޑާގެ ދަށުން މުހިންމު ފިޔަވަޅުތަކެއް މިއަހަރު އެޅުއްވުމަށް ނިންމަވައި، ރައީސް ޑރ. މުޙައްމަދު މުޢިއްޒު އެކަން ހާމަކުރައްވައިފިއެވެ.

ފައިބެއަހަރުގެ އޮކްޓޯބަރ 23 ގައި 'އެކްސް' ގައި ކުރެއްވި ޕޯސްޓެއްގައި އެމަނިކުފާނު ވަނީ 2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިގްތިސާދީ އިސްލާހީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަގްސަދުގައި ގިނަ ފިޔަވަޅުތަކެއް އެޅުމަށް ނިންމަވާފައިވާކަން ހާމަކުރައްވާފައެވެ.

އެގޮތުން އެންމެފުރަތަމަ ކަމަކަށް މުސާރައާއި ގުޅޭ ކަންކަން ފާހަގަކުރައްވައި، އަޅުއްވަން ނިންމަވާފައިވާ ފިޔަވަޅުތައް ވިދާޅުވެދެއްވާފައި ވެއެވެ.

ރައީސް ވިދާޅުވީ ދެ އަހަރު ދުވަހުގެ މުއްދަތަށް އެޅުމަށް ނިންމަވާފައިވާ ކަންކަމުގެ ތެރޭގައި ފުރަތަމަކަމަކަށް ސިޔާސީ މަގާމުތަކުގައި ތިބި ފަރާތްތަކުގެ މުސާރައިން 10 އިންސައްތަ އުނިކުރުން ހިމެނޭ ކަމަށެވެ. އަދި ބޭންކުތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން ވެސް 10 އިންސައްތަ އުނިކުރުމަށް ވަނީ ނިންމަވާފައެވެ.

މީގެއިތުރުން ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ވެސް ވަނީ ކަނޑައަޅުއްވާފައެވެ. ބައެއް ކުންފުނިތަކުގެ މުސާރަ އޮނިގަނޑު އޮތްގޮތުން 100،000 ރުފިޔާ އަށްވުރެ ބޮޑު މުސާރައެއް މިހާރު ލިބެއެވެ.

މީގެއިތުރުން މިނިވަން މުއައްސަސާތަކުގެ އިސްވެރިންގެ މުސާރައިންނާއި ޝަރުއީ ދާއިރާގެ އިސްވެރިންނާއި ރައްޔިތުންގެ މަޖިލީހުގެ މެމްބަރުންގެ މުސާރައިން ވެސް 10 އިންސައްތަ އުނިކުރުމަށް ނިންމާފައިވާ ކަމާށް ރައީސް ޑރ. މުޢިއްޒު ވަނީ ހާމަކުރައްވާފައެވެ. އަދި މަޖިލިސް މެމްބަރުންގެ މުސާރަ އުނިކުރައްވަނީ އެފަރާތްތަކުގެ އެދުމުގެ މަތީން ކަމުގައި ވިދާޅުވެފައި ވެއެވެ.

ހަމަމިއާއެކު ރައީސްގެ މުސާރައިން 50 އިންސައްތަ ނުނަންގަވާނެ ކަމުގައި ވިދާޅުވިއެވެ. އަދި މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާވާނެ ކަމުގައި ވަނީ ވިދާޅުވެފައެވެ.

2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤްޞަދުގައި ގިނަ ފިޔަވަޅުތަކެއް އެޅުމަށް ވާނީ ނިންމާފައި. މިގޮތުން މުސާރައާއި ގުޅޭ ގޮތުން ތިރީގައިވާ ފިޔަވަޅުތައް 2 އަހަރު ދުވަހުގެ މުއްދަތަށް…

— Dr Mohamed Muizzu (@MMuizzu) October 23, 2024