ދިޔަވަރުބޮޑުވާ ވަގުތުތަކުގައި އުދަ އަރާފާނެތީ ސަމާލުވުމަށް ކަމާއިބެހޭ އިދާރާތަކުން އެދިއްޖެއެވެ.

އެފަރާތްތަކުން މިފަދައިން އެދުނީ ރާއްޖެއަށް މިހާރުކުރަމުންދާ ވިއްސާރައިގެ ސަބަބުންނެވެ.

މެޓް އޮފީހުން ހާމަކުރައްވާފައިވާ ގޮތުގައި އުދަ އެރުމުގެ ފުރުސަރު އެންމެބޮޑީ މެދުރާއްޖެތެރޭގެ ރަށްތަކަށެވެ. އަދި މާލެއަށް ދިޔަވަރު އެންމެބޮޑުވާނީ ދަންވަރު 3:35 ގައި ކަމަށާއި އުދަ އަރާނަމަ، މެންދަމު 1 ން ފެށިގެން އުދައިގެ އަސަރު ކުރަން ފަށާނެ ކަމަށް ވެސް މެޓް އޮފީހުން ބުނެއެވެ.

ރާއްޖެއަށް ކުރަމުންދާ ވިއްސާރަ އަލިވާނެކަމަށް ލަފާކުރެވެނީ ހޯމަ ދުވަހު ކަމަށާއި ކުރިއަށް އޮތް ދެ ދުވަހު ވެސް މާލެ އާއި މާލެ ކައިރި ސަރަހައްދުތަކަށް ގުގުރުމާއެކު ވިއްސާރަކޮށް ބޯކޮށް ވާރޭ ވެހޭނެ ކަމަށް މެޓުން ވަނީ ބުނެފައެވެ. އަދި ވައި ވެސް ގަދަވާނެ ކަަމަށް ވަނީ ހާމަކޮށްފައެވެ.

މީގެއިތުރުން ރާއްޖޭގެ ކަނޑުތައް ވެސް ގަދަވާނެ ކަމަށާއި ރާޅުގެ އުސްމިން ހުންނާނީ 5 ފޫޓާއި 8 ފޫޓާއި ދެމެުގައި ކަމަށް ވަނީ ބުނެފައެވެ. އަދި ދިޔަވަރު ބޮޑުވާ ގަޑިތަކުގައި ބައެއް ރަށްރަށަށް އުދަ އެރުން އެކަށީގެންވާ ކަމަށް ވެސް ބުނެއެވެ.