ވަޢުދުވެވަޑައިގެންފައިވާ ބޯހިޔާވަހިކަމުގެ ހުރިހައި މަޝްރޫއުތައް ޢަމަލީ ގޮތުން ހިންގައިދޭނެ ފަރާތްތައް ހޯދުމަށް، މި ހިނގާ ޖަނަވަރީ މަހުގެ ތެރޭގައި އިއުލާން ކުރައްވާނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މާލެ އަތޮޅު ގުޅިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.

އެގޮތުން އެކި ފަރާތްތަކާ މަސައްކަތްތައް ހަވާލު ކުރެވޭ ތަރުތީބުން، މި އަހަރު ވެގެންދާނީ ގެދޮރުވެރިކަމުގެ ދާއިރާއިން އެއް އަހަރެއްގެ ތެރޭގައި ޢަމަލީގޮތުން އެންމެ ގިނަ މަޝްރޫއު ހިންގޭނެ އަހަރަށް ކަމުގައި ވެސް ވިދާޅުވިއެވެ. އަދި ބިން ހިއްކައި، ޖާގަ އިތުރު ކުރެވިފައިވާ ރަށްތަކުގައި ވެސް ކުރިއަށް ހުރި އަހަރުތަކުގެ ތެރޭގައި މިކަން ހިނގަމުންދާނެ ކަމަށް ވިދާޅުވިއެވެ.

މީގެއިތުރުން މާލެ އަތޮޅު ގުޅިއާ ދާދި ކައިރީގައި އޮތް ފަޅަކީ، އަދުގެ ސަރުކާރުން ހިންގާ ބޯހިޔާވަހިކަމުގެ އެންމެ މުހިންމު މަޝްރޫއު ހިނގާ ސަރަހައްދުކަން ފާހަގަކުރައްވައި، "ރަސްމާލެ" މަޝްރޫއަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އެއް ސަރަހައްދަކުން އެންމެ ބޮޑު ހައްލެއް ލިބޭނެ މަޝްރޫއުކަން ފާހަގަކުރެއްވިއެވެ.

ރައީސް ވަނީ އިއުލާންކުރައްވާފައިވާ ގޮތަށް މާލެ ސަރަހައްދުގެ މަޝްރޫއުތައް ވެސް ކުރިއަށްދާނެ ކަމުގައި ވިދާޅުވެފައެވެ.

ވަގުތީ ހިތްހަމަނުޖެހުންތަކެއް ހުރި ކަމުގައި ވީ ނަމަވެސް، އެންމެން އެކަތިގަނޑެއްގެ ގޮތުގައި މަސައްކަތްކޮށް، ގައުމަށާއި މުޖުތަމައަށް ފައިދާ ލިއްބައިދެނިވި މޭރުމަކުން ކަންކަން ކުރިއަށް ގެންދެވުމަށް ރައީސް ޑރ. މުޢިއްޒު ވަނީ ގޮވާލައްވާފައެވެ.