2018 ވަނަ އަހަރު ޕީޕީއެމްގެ ސަރުކާރު ނިމުނުއިރު، އައިލެންޑް އޭވިއޭޝަނަކީ ފައިދާވާ، ހިންގުން ހަރުދަނާ ކުންފުންޏެއް ކަމަށް ޓްރާންސްޕޯޓު މިިނިސްޓަރ މުޙައްމަދު އަމީން ވިދާޅުވެއްޖެއެވެ.

އެހެންނަމަވެސް ނިމިދިޔަ އެމްޑީޕީގެ ސަރުކާރުގައި ގެންގުޅުނު ސިޔާސަތުތަކުގެ ސަބަބުން ގައުމީ އެއަރލައިނަށް ބޮޑެތި ގެއްލުންތަކެއް ލިބިފައިވާކަން ފާހަގަކުރައްވައި، މިނިސްޓަރު ވަނީ ދުރު ރާސްތާތަކަށް ދަތުރުތައް ފެށިފައިނުވަނީ ކުރީ ސަރުކާރުތަކުން ގެންގުޅުނު ސިޔާސަތުތަކުގެ ސަބަބުން ކަމުގައި ވެސް ވިދާޅުވެފައެވެ.

"ގައުމީ އެއަރލައިންއަށް ކުރިއެރުން ނުލިބި އޮތީ ކުރީގެ ދޯހަޅި ސިޔާސަތުތަކުގެ ސަބަބުން. ނަމަވެސް މި ސަރުކާރުން އެކަން ބަދަލުކޮށް، ގައުމީ އެއަރލައިނަށް ބޮޑެތި ކުރިއެރުންތަކެއް ގެނެސްދެއްވާނެ."

ރާއްޖެއަކީ ގިނަ އަދަދެއްގެ ފަތުރުވެރިން ޒިޔާރަތްކުރާ ގައުމަކަށްވުމުން ދުރު މަންޒިލްތަކަށް ގައުމީ އެއަރލައިން މެދުވެރިކޮށް ދަތުރުތައް ކުރެވިދާނެ ކަަމަށް ވެސް ވިދާޅުވިއެވެ.

ޑރ. މުހައްމަދު މުއިއްޒު ރާއްޖޭގެ ވެރިކަމާއި ހަވާލުވެވަޑައިގަތުމަށްފަހު ގައުމީ އެއަރލައިން ތަރައްގީކޮށް، ކުރިއެރުވުމަށް ގިނަ މަސައްކަތްތަކެއް ފައްޓަވާފައިވާ ކަމަށާއި އެގޮތުން ކުންފުނީގެ ދަރަނިތައް ހަލާސްކޮށް، ފައިދާވާ ކުންފުންޏަކަށް އައިލެންޑް އޭވިއޭޝަން ހައްދަވާނޭކަމަށް މިނިސްޓަރު ވަނީ ވިދާޅުވެފައެވެ.