ޓެރަރިސްޓް ޖަމާއަތް އައިއެސްގެ ޕްރޮޕެގެންޑާ ފަތުރާކަމަށް ތުހުމަތުކޮށް ރާއްޖެއިން ހައްޔަރުކޮށް ދައުވާކޮށްފައިވާ ކ. މާލެ، ވ. ދެލްވައްތަ، ހޫދު މުހައްމަދު ޒާހިރު ބަންދުން ދޫކޮށްލީ ގޯސްކޮށް ކަމަށް ހައިކޯޓުން ކަނޑައަޅައިފިއެވެ.

އޭނާ ހައްޔަރުކޮށްފައިވަނީ ދިވެހި ފުލުހުންނާއި އެމެރިކާގެ އެފްބީއައި އަދި ޔޫރަޕިއަން ޔޫނިއަންގެ ދެ ގައުމެއްގެ އިދާރާތައް ގުޅިގެން ހިންގި އޮޕަރޭޝަނެއްގައެވެ.

ހޫދުގެ މައްޗަށް ޓެރަރިޒަމް މަނާކުރުމުގެ ގާނޫނުގެ ދަށުން ފަސް ދައުވާއެއް ކޮށްފައިވެއެވެ. މި ދައުވާތަކާއި ގުޅިގެން ޝަރީއަތް ނިމެންދެން ހޫދު ބަންދު ކުރީ 19 އޭޕްރިލް 2022 ގައެވެ.

މި މައްސަލައިގެ ޝަރީއަތް ކްރިމިނަލް ކޯޓުގައި ކުރިއަށްދާއިރު، ހޫދުގެ ފަރާތުން ހުށަހެޅި ސިޓީއަކާ ގުޅިގެން ފައިބެއަހަރުގެ އޮކްޓޫބަރު 16 ވަނަ ދުވަހު ކްރިމިނަލް ކޯޓުން ވަނީ އޭނާ ޝަރީއަތް ނިމެންދެން ބަންދުކުރުމަށް ކަނޑައެޅި އަމުރު 60 ދުވަހަށް ސަސްޕެންޑްކޮށް، ޝަރުތުތަކާއެކު އޭނާ ބަންދުން ދޫކޮށްލާފައެވެ. އަދި އެ އަމުރުގެ މުއްދަތު އިތުރުކޮށްދިނުމަށް އެދި ހޫދުގެ ފަރާތުން 8 ޑިސެމްބަރުގައި ހުށަހެޅުމުން ކްރިމިނަލް ކޯޓުން ވަނީ އިތުރު 60 ދުވަހަށް ހޫދު ބަންދުން ދޫކޮށްލުމަށް ވެސް ނިންމާފައެވެ.

ކްރިމިނަލް ކޯޓުގެ މި ނިންމުން ޕްރޮސިކިއުޓަރ ޖެނެރަލްގެ އޮފީހުން ހައިކޯޓުގައި އިސްތިއުނާފުކޮށް، އެދިފައިވަނީ ހޫދު ބަންދުން ދޫކުރުމުގެ އަމުރަކީ ބާތިލު އަމުރެއް ކަމަށް ކަނޑައަޅައިދިނުމަށެވެ.

އެހެންވެ، ހޫދު ޝަރީއަތް ނިމެންދެން ބަންދުކޮށްފައިވަނީ ޓެރަރިޒަމް މަނާކުރުމުގެ ގާނޫނުގެ ދަށުން ކަމަށާއި ނަމަވެސް އޭނާގެ ބަންދު މުރާޖައާކޮށް ދޫކޮށްލާފައިވަނީ ޖިނާއީ އިޖުރާއަތުގެ ގާނޫނުގެ ދަށުންކަން މި މައްސަލައިގައި ހައިކޯޓުގައި މައްސަލަ ބެއްލެވި ފަނޑިޔާރުން ވަނީ ފާހަގަކުރައްވާފައެވެ. އަދި ވިދާޅުވެފައިވަނީ ހާއްސަ އިޖުރާއަތެއްގެ ދަށުން ބަންދުގައި ހުރި މީހެއްގެ ބަންދު މުރާޖައާކޮށް އަލުން ގޮތެއް ކަނޑައަޅަންޖެހޭނީ ވެސް އެ ހާއްސަ ގާނޫނުގެ ދަށުން ކަމަށެވެ.

މީގެއިތުރުން ޓެރަރިޒަމް މަނާކުރުމުގެ ގާނޫނުގެ ދަށުން ޝަރީއަތް ނިމެންދެން ބަންދުކޮށްފައިވާ ފަރާތެއްގެ ބަންދު މުރާޖައާކުރުމަށް ހުށަހެޅޭނީ ޕްރޮސިކިއުޓަރ ޖެނެރަލަށް ކަމަށް އެ ގާނޫނުގައި ބަޔާންކޮށްފައިވާ ކަމަށާއި އެހެންކަމުން ހޫދުގެ ބަންދު މުރާޖައާ ކޮށްފައިވަނީ ރަނގަޅު އިޖުރާއަތެއްގެ ތެރެއިން ކަމަށް ބެލެވެން ނެތް ކަމަށް ހައިކޯޓުން ވިދާޅުވެއެވެ.

ހައިކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ޖަނަވަރީ 6 ވަނަ ދުވަހު ވަނީ، ހޫދު ބަންދުން ދޫކުރުމަށް ކްރިމިނަލް ކޯޓުން ނެރުނު އަމުރު ބާތިލުކުރައްވާފައެވެ. މިމައްސަލަ ބެއްލެވީ ފަނޑިޔާރު މުހައްމަދު ފައިސަލް، އިސްފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ނިޔާޒް އެވެ.