އަވަށްޓެރި އިންޑިއާ އިން ރާއްޖޭގެ އެމްއެންޑީއެފް އަށް 4 މިލިއަން ރުފިޔާގެ ސާމާނު ހަދިޔާކޮށްފިއެވެ.

މި ސާމާނު ހަދިޔާކުރުމުގެ އެއްބަސްވުމުގައި ސޮއިކޮށްފައިވަނީ ރާއްޖޭގެ ޑިފެންސް މިނިސްޓަރ މުޙައްމަދު ޣައްސާން މައުމޫން އެގައުމަށް މިހާރުކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

މި ދަތުރުފުޅުގައި ދިފާއީ ގުޅުންތައް ހަރުދަނާކުރުމުގެ މަސައްކަތުގެ ތެރެއިން އިންޑިއާގެ ދިއްލީގައި މުހިންމު މަޝްވަރާތަކެއް ވަނީ ކުރައްވާފައެވެ.

އިންޑިއާގެ ވިއޯން ނޫހުން ހާމަކޮށްފައިވާ ގޮތުގައި މިއީ މި ސަރަހައްދީ ކަނޑުގެ ސަލާމަތާއި ރައްކާތެރިކަން ހަރުދަނާ ކުރުމާއި މައުލޫމާތު ބަދަލުކުރުމާއި ތަމްރީނުގެ ޒަރިއްޔާއިން ދިވެހި އަސްކަރިއްޔާގެ ގާބިލުކަން އިތުރު ކުރުމުގެ މަގްސަދުގައި ބޭއްވި މަޝްވަރާއެއް ކަމަށެވެ.

މީގެއިތުރުން އުތުރުތިލަފަޅު (ޔޫޓީއެފް) ގައި ތަރައްގީކުރާ ބަނދަރުގެ މަސައްކަތް އަވަސްކުރުމަށް ދެ މިނިސްޓަރުން ވެސް އެއްބަސްވެވަޑައިގެންނެވިކަމަށް އެ ނޫހުގައި ވަނީ ހާމަކޮށްފައެވެ.

މިއީ ޑިފެންސް މިނިސްޓަރުގެ ހައިސިއްޔަތުން ޣައްސާން އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.