މަގުމައްޗަށް ނުކުމެ އިހުތިޖާޖުކުރަން އެމްޑީޕީގެ ގައުމީ މަޖިލީހުން ފާސްކޮށްފިއެވެ.

އެޕާޓީން މިގޮތަށް ފާސްކުރީ ޖަނަވަރީ 8 ވަނަ ދުވަހުގެ ރޭ ބޭއްވި ގައުމީ މަޖިލީހުގެ ޖަލްސާގައެވެ. އަދި ފާސްކުރީ ޖަނަވަރީ މަހުގެ 31 ވަނަ ދުވަހު މާލޭގެ މަގުމައްޗަށް ނުކުމެ އިހުތިޖާޖު ކުރުމަށެވެ.

އެމްޑީޕީން މިގޮތަށް ފާސްކޮށްފައިވާއިރު، އެ ޕާޓީން ވަނީ މިދިޔަ އަހަރުގެ ޑިސެމްބަރ މަހުގެ 10 ވަނަ ދުވަހުގެ ރޭ ގާނޫނު އަސާސީގެ ދިފާއުގައި ބޮޑު ޖަލްސާއެއް ވެސް ބާއްވާފައެވެ. އަދި އެޖަލްސާ ފެށުމުގެ ކުރިން އެ ރޭ އެމްޑީޕީން ވަނީ ގައުމީ މަޖިލީހުގެ ބައްދަލުވުމެއް ވެސް ބާއްވާފައެވެ.

އެ ބައްދަލުވުމުގައި އިދިކޮޅު ސިޔާސީ ހަރަކާތް މުޅި ރާއްޖޭގެ އެކިކަންކޮޅުތަކަށް ފުޅާކޮށް އިހުތިޖާޖުތައް ރާވައި ހިންގުމަށް ފާސްކޮށްފައިވާއިރު، އެ ހަރަކާތްތަކަށް ސިޔާސީ ހަރަކާތްތަކުގައި އެހެން ސިޔާސީ ޕާޓީތަކާއި މަދަނީ ޖަމިއްޔާތަކަށް ވެސް ދައުވަތު ދިނުމަށް ވަނީ ނިންމާފައެވެ.