ދެކުނު ކެލިފޯނިއާ ޕެލިސޭޑްސްގެ 75 އިންސައްތަ އަނދާ އަޅިއަށް ވެއްޖެއެވެ.

ބޭރުގެ ނޫސްތަލުގައި ރިޕޯޓުކޮށްފައިވާ ގޮތިުގައި ދެކުނު ކެލިފޯނިއާގައި ހިނގަމުންދާ ޕެލިސޭޑްސް އަލިފާނުގެ ހާދިސާގައި މިހައިތަނަށް ވަނީ 15،832 އޭކަރުގެ ސަރަހައްދެއް އަނދާފައެވެ. އަދި އެ އަވަށުގެ 75 އިންސައްތަ މިހާރުވަނީ އަނދާ އަޅިއަށްވެފައެވެ.

މީގެއިތުރުން ލޮސް އެންޖެލެސް ސަރަހައްދުގެ ސަތޭކަ ހާސް ގޭބިސީތަކާއި ވިޔަފާރިތަކުން ކަރްނޓުި ކެނޑިފައިވާ ކަމަށް ވެސް ބުނެއެވެ. އަދި މި ހާދިސާގައި ލިއޮނާޑޯ ޑިކެޕްރިއޯ، ޕެރިސް ހިލްޓަން އަދި މައިލްސް ޓެލަރ ފަދަ މަޝްހޫރު ތަރިންގެ ގެތައް ވެސް އަނދާފައިވާކަމަށް ރިޕޯޓުތައް ބުނެއެވެ.

ނޫސްތަކުގައި ބުނެފައިވާގޮތުގައި ގެއްލުމުގެ އަދަދު 57 ބިލިއަން ޑޮލަރަށް އަރާނެ ކަމަށް ލަފާކުރެވޭއިރު، މިއީ އެމެރިކާގެ ތާރީހުގައި އެންމެ ބޮޑު ގެއްލުން ލިބުނު އަލިފާނުގެ ހާދިސާ ކަމުގައިވުން ވެސް އެކަށީގެންވާ ކަމަށް ބުނެއެވެ.

ދެކުނު ކެލިފޯނިއާގެ ލޮސް އެންޖެލެސް ސަރަހައްދުގައި އަލިފާނުގެ ހަތަރު ހާދިސާއެއް މިހާރުވެސް ދަނީ ހިނގަމުންނެވެ. އެއީ ޕެލިސޭޑްސް އަލިފާން 2925 އޭކަރު، އީޓަން އަލިފާން 10600 އޭކަރު، ހަރސްޓް އަލިފާން 700 އޭކަރު އަދި ވުޑްލީ އަލިފާން 30 އޭކަރު އެވެ.

މި އަލިފާންގަނޑުތައް ނިއްވުމުގައި ދިމާވެފައިވާ އެންމެބޮޑު ދައްޗަކީ ޕެސިފިކް ޕެލިސޭޑްސްގައި ހުރި ގިނަ އަދަދެއްގެ ފެން ހޮޅިތަކުން ފެން ހުސްވުން ކަމަށް އެ މަސައްކަތުގައި ހަރަކާތްތެރިވާ ފަރާތްތަކާ ހަވާލާދީ ރިޕޯޓުތައް ބުނެއެވެ.