ރައްޔިތުންގެ މަޖިލީހުގެ ދެ ޖަލްސާއެއް މި މަހު ބާއްވަން ނިންމައިފިއެވެ.

މަޖިލީހުގެ މެޖޯރިޓީ ލީޑަރ އަދި ޕީއެންސީ ޕާލަމަންޓްރީ ގްރޫޕްގެ ލީޑަރ އިބްރާހިމް "ވީނިއުސް" އަށް ވިދާޅުވެފައިވަނީ ދައުރުން ބޭރުގައި ދެ ޖަލްސާއެއް ބާއްވަން ނިންމާފައިވާކަމަށެވެ. އަދި މި ޖަލްސާ ބާއްވަނީ މިމަހުގެ 16 އަދި 20 ވަނަ ދުވަހު ކަމަށެވެ.

މީގެއިތުރުން މިއީ މިހާރު ހުސްވެފައިވާ މިނިވަން މުއައްސަސާތަކުގެ ޖާގަތަކަށް މީހުން ނެގުމުގެ މަސައްކަތް ކުރިޔަށްގެންދިޔުމަށް އޭނާ ވަނީ ވިދާޅުވެފައެވެ.

މަޖިލިސް ޗުއްޓީއަށް ގޮސްފައިވަނީ އިލެކްޝަންސް ކޮމިޝަން (އީސީ) އާއި ބްރޯޑްކާސްޓިންގ ކޮމިޝަނަށް މެމްބަރުން އައްޔަންނުކޮށެވެ.

އީސީގެ ދެ މެމްބަރުންކަމުގައިވާ ނައިބު ރައީސްކަމުގައި ހުންނެވި އަލީ ނަޝާތު އާއި މުހައްމަދު އާސިފް މަސްއޫލިއްޔަތު އަދާކުރުމުގައި އިހުމާލުވެ، ގާނޫނާއި ހިލާފު އެތައް ކަމެއް ކުރައްވުމުގެ ތުހުމަތާއެކު ވަނީ މަގާމުން ވަކިކޮށްފައެވެ. އެހެންކަމުން އެ ދެ މަގާމު އޮތީ ހުސްކޮށްނެވެ. އީސީގެ މެމްބަރު ކަމުގެ މަގާމު ހުސްވާތާ 60 ދުވަހުގެ ތެރޭގައި އެމަގާމަށް މެމްބަރަކު އައްޔަނުކުރަންޖެހޭއިރު މަޖިލިސް ދެން ހުޅުވޭއިރު އެ މުއްދަތު ހަމަވެއެވެ.