އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑުން އުމްރާ އަށް މީހުން ގެންދިއުމަށް ދޫކޮށްފައިުވާ ހުއްދަ ހިފަހައްޓައި، އެއްލައްކަ ރުފިޔާ އިން ޖޫރިމަނާކޮށްފިއެވެ.

އިސްލާމިކް މިނިސްޓްރީން ވިދާޅުވީ އެ ކުންފުނީގެ 2024 ޑިސެމްބަރު އުމްރާ ދަތުރުގައި ދިއުމަށް ހަމަޖެހިފައިވާ ޢުމްރާވެރިން ދަތުރަށް ފައިސާ ދައްކާފައިވީނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ، އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާކަމަށް އެ ކުންފުނިން އިއުތިރާފުވެފައިވާ ކަމަށެވެ.

"މައްކާއިން ރާއްޖެ އައުމަށް ޓިކެޓު ނަގާފައި ނެތުމުގެ ސަބަބުން ރާއްޖެ ނާދެވިގެން އެ އުމްރާވެރިން މިނިސްޓްރީ އޮފް އިސްލާމިކް އެފެއާޒްގެ އެހީތެރިކަމަށް އެދިފައިވުމާއެކު، ހާލުގައި ޖެހިފައި ތިބި 23 އުމްރާވެރިން ވަނީ 09 ޖަނަވަރީ 2025 ގައި، މިނިސްޓްރީ އޮފް އިސްލާމިކް އެފެއާޒްގެ އިރުޝާދުގެ ދަށުން މޯލްޑިވްސް ޙައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް ގެނެވިފައެވެ."

މީގެއިތުރުން އެ ކުންފުނީގެ ފަރާތުން ރާއްޖެއިން އުމްރާއަށް މީހުން ގެންދިޔުމާބެހޭ އުސޫލާއި ހިިލާފުވެފައިވާތީ މި އުސޫލުގެ ދަށުން ރާއްޖެއިން އުމްރާއަށް މީހުން ގެންދިއުމަށް މިނިސްޓްރީން، އެ ކުންފުންޏަށް ދޫކޮށްފައިވާ ހުއްދަ ހިފެހައްޓައި، އެއްލައްކަ (-/100،000) ދިވެހި ރުފިޔާއިން ޖޫރިމަނާކޮށްފައިވާ ކަމަށް ވަނީ ވިދާޅުވެފައެވެ.

ހަމަމިއާއެކު އެ ކުންފުންޏާއި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުމަށް ވެސް ވަނީ ނިންމާފައެވެ. އަދި އެ ކުންފުނީގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް އިސްލާމިކް މިނިސްޓްރީން ކުރި ހަރަދު އެ ކުންފިން ހޯދުމަށާއި ރާއްޖެއިން އުމްރާ އަށް މީހުން ގެންދިއުމުގެ އުސޫލާ ހިލާފުވެފައިވާތީ، މި މައްސަލަ ތަހްގީގުކޮށް ގާނޫނީ ފިޔަވަޅު އެޅުމަށް ދިވެހި ފުލުހުންގެ ހިދުމަތަށް ހުށަހެޅުމަށް ވެސް ވަނީ ނިންމާފައެވެ.