ރާއްޖޭގައި ދަނޑުވެރިންނަށް އޮތީ އުފާފާގަތިކަން ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ހުވަދުއަތޮޅުގެ ބައެއް ރަށްތަކަށް މިހާރުކުރައްވަމުން ގެންދަވާ ދަތުރުފުޅުގެ ތެރެއިން ގއ. ނިލަންދޫ ރައްޔިތުންނާ މުހާތަބުކުރައްވައި، ވާހަކަފުޅު ދައްކަވަމުން އެމަނިކުފާނު ވިދާޅުވީ ސަރުކާރުގެ އަމާޒަކީ ދަނޑުވެރިކަމުގެ ސިނާއަތުގެ ހިންގުން ހަރުދަނާކުރެއްވުން ކަމަށެވެ. އަދި ރާއްޖެއަށް ބޭނުންވާ މިންވަރަށް ރާއްޖޭގައި ކާބޯތަކެތި ހެއްދުމުގެ މަސައްކަތް ވެސް މިހާރު ސަރުކާރުން ފައްޓަވައި، އިންވެސްޓަރުން ހޯދުމުގެ މަސައްކަތް ކުރައްވަމުންގެންދަވާ ކަމަށް ވިދާޅުވިއެވެ.

ރައީސް ވިދާޅުވީ ދަނޑުވެރިކަމަކީ ރާއްޖޭގެ އިގްތިސާދު ސިންދަފާތުކުރުމަށް ބަލާއިރު، ވަރަށް ބޮޑަށް ސަމާލުކަން ދެއްވާ ދާއިރާއެއް ކަމަށާއި އެހެންކަމުން ނިލަންދޫގެ ދަނޑުވެރިންނާއި ޖުމުލަކޮށް ރާއްޖޭގެ ދަނޑުވެރިންނަށް ދަނޑުވެރި އުފެއްދުންތަކުން ނަފާހޯދޭނޭކަން ފާހަގަކުރެއްވިއެވެ.

މީގެއިތުރުން ރަށުގެ ތަރައްގީއަށް ކުރަން ހުރި ކަންތައްތަކަށް ސަމާލުކަން ދެއްވައިގެން ރައްޔިތުންގެ އުންމީދުތަކުގައި ހަގިގީ ކުލަ ޖައްސައިދެއްވާނޭކަމުގެ ޔަގީންކަން ރައީސް ވަނީ ދެއްވާފައެވެ.