މިއަހަރު ތެރޭގައި ރަތަފަންދޫއަށް ބޭނުންވާ ގިނަ ކަންކަން ފެށޭނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރަތަފަންދޫއަށް މިއަދު ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.

ރައީސް ވިދާޅުވީ އެކަންކަމަށް ސަރުކާރުން ވަރަށް އިސްކަންދެއްވާނެ ކަމަށާއި އެރަށުގެ ފެނާ ނަރުދަމާގެ މަޝްރޫއު އަލުން ފަށައި، އެކްސްޓެންޑް ކުރަންޖެހޭ ސަރަހައްދާއެކު އެ މަސައްކަތް ކޮށްދެއްވާނެކަމުގެ ޔަގީންކަން އެ ރަށު ރައްޔިތުންނަށް ދެއްވިއެވެ. އަދި އެރަށުގެ ގިރާ ސަރަހައްދު ހިމާޔަތް ކުރުމުގެ މަޝްރޫއުގެ މަސައްކަތް ކުރާއިރު، ރަށު ރައްޔިތުން މޫދަށް އެރޭނެ ސަރަހައްދަކާއެކުގައި ތަރައްގީ ކުރައްވާނެ ކަމުގައި ވެސް ވިދާޅުވިއެވެ.

މީގެއިތުރުން މިއަހަރު ތެރޭގައި ރާއްޖޭގެ ހުރިހާ ރަށެއްގައި އޭ.ޓީ.އެމް.ގެ ހިދުމަތް ގާއިމުކުރުމުގެ މަޝްރޫއުގައި ރަތަފަންދޫގައި ވެސް އޭ.ޓީ.އެމް.ގެ ހިދުމަތް ފަށްޓަވާނެކަން ހާމަކުރެއްވިއެވެ. އަދި ކުނި މެނޭޖްކުރުމަކީ ވެސް ހަމަ މިފަދަ އެހެން މަޝްރޫއެއް ކަމަށް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ މިއަހަރު ތެރޭގައި ރާއްޖޭގެ ހުރިހާ ރަށެއްގައި، އެރަށެއްގެ އާބާދީއާއި އެރަށެއްގެ ނީޑަށް ބަލާފައި އެރަށަކަށް ބޭނުންވާ ކެޕޭސިޓީގައި، އެ ރަށަކަށް ބޭނުންވާ ފެންވަރުގައި، ހުރިހާ ކަމެއް ހަމަކުރެވިފައިވާ، ތަކެތީގެ ގޮތުންނާއި އެކިކަހަލަ ވަސީލަތްތަކުގެ ގޮތުން ކަންތައް ފުރިހަމަ ކުރެވިފައިވާ، ކުނި މެނޭޖްކުރުމުގެ މަރުކަޒެއް ރަތަފަންދޫގައި ގާއިމުކޮށްދެއްވާނެ ކަމަށެވެ.

ހަމަމިއާއެކު ރަށުގެ އައިސް ޕްލާންޓުގެ މަސައްކަތަކީ ސަޢުދީ ފަންޑުގެ އެހީގައި ކުރައްވަމުންދާ މަސައްކަތެއް ކަމަށާއި މާލީ ވަޒީރު ވަރަށް އަވަހަށް އެ ފަންޑުގެ ބޭފުޅުންނާ ބައްދަލުކުރައްވާނެ ކަމަށް ވަނީ ވިދާޅުވެފައެވެ. އަދި އެ މަޝްރޫއުގެ ތެރެއިން ހަމަޖެހެންޖެހޭ ބައެއް ކަންކަން ހަމަޖެހިގެންދިއުމާއެކުގައި އެ މަޝްރޫއުގެ ދަށުން އެޅުމަށް ހަމަޖެހިފައިވާ އައިސްޕްލާންޓްތަކުގެ މަސައްކަތް ކުރިއަށްދާނެ ކަމުގައި ވިދާޅުވިއެވެ.