ގ. އުފުރިޔާ ގޭގައި ހިނގި އަލިފާނުގެ ހާދިސާ އާ ގުޅިގެން ބޯހިޔާވަހިކަން ބޭނުންވީ އެންމެ މީހެއް ކަމުގައި ޑިޒާސްޓަރ މެނޭޖުމެންޓް އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.

އެ އޮތޯރިޓީން ވިދާޅުވީ އެގޭގެ އެޕާޓްމަންޓެއްގައި ހިނގި އަލިފާނުގެ ހާދިސާއާއި ގުޅިގެން އެ އެޕާޓްމަންޓުގައި ދިރިއުޅުނު މީހުންގެ ތެރެއިން އެހީތެރިކަން ބޭނުންވީ އެންމެ ފަރާތެއް ކަމަށެވެ. އަދި އެފަރާތަށް އެއްދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު އެ އޮތޯރިޓީން ހަމަޖައްސައިދީފައިވާ ކަމަށެވެ.

މި ހާދިސާއާއި ގުޅިގެން އެމްއެންޑީއެފް އިން ވިދާޅުވެފައިވަނީ އަލިފާން ރޯވީ ގ. އުފުރިޔާގޭގެ ހަވަނަ ފަންގިފިލާގައި ކަމަށެވެ. އަދި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން ހަރަކާތްތެރިވެ، އަލިފާން ނިއްވާލާފައިވާ ކަމަށެވެ.

މީގެއިތުރުން އެ ހާދިސާގެ މައުލޫމާތު ޖަނަވަރީ 6 ވަނަ ދުވަހުގެ ރޭ 11:23 ހާއިރު ލިބުމާ އެކު ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށާއި މިގޮތުން އަލިފާންގަނޑު އެއްކޮށް ނިއްވާލާފައިވަނީ ދަންވަރު 12:10 ގައި ކަމަށް ވިދާޅުވިއެވެ.

މި ހާދިސާގައި އަލިފާން ރޯވި އެޕާޓްމެންޓްގެ އެއް ކޮޓަރި ވަނީ ބޭނުން ނުކުރެވޭވަރަށް އަނދާފައި ކަމަށާއި އިމާރާތުގެ ހުރިހައި ފުލޯއަކުން މީހުން ހުސްކޮށް އިވެކުއޭޓް ކޮށްފައިވާ ކަމަށް ވެސް ވިދާޅުވިއެވެ. އަދި އަލިފާން ރޯވެފައިވަނީ ހަވަނަ ފަންގިފިލާގެ އެޕާޓްމެންޓް ބީގައި ނަމަވެސް އަލިފާން އިތުރު އެހެން ދިމާލަކަށް ފެތުރިފައި ނުވާ ކަމަށް ވެސް ވިދާޅުވިއެވެ.

އެމްއެންޑީއެފް އިން އިތުރަށް ވިދާޅުވީ މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވާ ކަމަށެވެ. އެހެންނަމަވެސް ދުމުގެ އަސަރުކޮށްގެން އުމުރުން ދުވަސްވީ މީހަކު ހޮސްޕިޓަލަށް ގެންދިޔަކަމަށް ވިދާޅުވިއެވެ.