ގދ. ހޯޑެއްދޫގައި ފެނާއި ނަރުދަމާގެ ހިދުމަތް ރަސްމީކޮށް އިފްތިތާހުކޮށްފިއެވެ.

މި ހިދުމަތް ރަސްމީކޮށް އިފްތިތާހުކޮށްދެއްވީ ހުވަދުއަތޮޅަށް ކުރައްވާ ދަތުރުފުޅުގައި ހޯޑެއްދޫއަށް ވަޑައިގެން ރައީސް ޑރ. މުޙައްމަދު މުޢިއްޒުއެވެ.

2022 ވަނަ އަހަރުގެ ޖޫން މަހުގެ 13 ވަނަ ދުވަހު ޢަމަލީ މަސައްކަތް ފަށައި، ފެނާއި ނަރުދަމާ ގާއިމްކޮށްފައިވަނީ އެގްޒިމް ބޭންކް އޮފް އިންޑިއާގެ ލައިން އޮފް ކްރެޑިޓްގެ ދަށުންނެވެ. މި މަސައްކަތްކޮށްފައިވަނީ އިންޑިއާގެ ކުންފުންޏެއްކަމަށްވާ ޓްރެވެނީ އިންޖިނިއަރިންގ އެންޑް އިންޑަސްޓްރީސް ލިމިޓެޑުންނެވެ.

4.9 މިލިއަނަށްވުރެ ގިނަ އެމެރިކާ ޑޮލަރު ހަރަދުކޮށްފައިވާ މި މަޝްރޫއުގެ ދަށުން ނަރުދަމާގެ 5 ޕަންޕު ސްޓޭޝަން ގާއިމުކޮށް ސީ އައުޓް ފޯލް އަޅައި، މުޅި ރަށުގައި ފެނާއި ނަރުދަމާ ނިޒާމުގެ ވިއުގަ ވަނީ އަޅާފައެވެ.

މީގެއިތުރުން ގޭގެއަށް ކަނެކްޝަން ގުޅާފައިވާއިރު، ދުވާލަކު 75 ޓަނުގެ ފެން އުފެއްދޭ ވަރުގެ 2 އާރުއޯ ޕްލާންޓް ބަހައްޓައި، ފެން ރައްކާކުރުމަށް 2 ޓޭންކު ވަނީ ބަހައްޓާފައެވެ.