ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) ގެ ކުރީގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު ދިރިއުޅޭ ގެ ފުލުހުން ބަލައި ފާސްކުރި އިރު، ގިނަ އަދަދެއްގެ ފައިސާ ހުރި ދަބަހެއް ފެނިފައިވާކަމަށް މައުލޫމާތު ލިބިއްޖެއެވެ.

ބައެއް މަސްދަރުތަކުން ދިވެހި ފުލުހުންގެ ހިދުމަތާ ހަވާލާދީ ބުނެފައިވަނީ މިއީ ބިންވެރިޔާ އަދި ގެދޮރުވެރިޔާ ސްކީމާ ގުޅިގެން ފުލުހުން ހިންގި ތަހުގީގުގައި ފަޒުލް ދިރިއުޅޭ ގެއިން ފެނުނު ފައިސާއެވެ. އަދި އެ ފައިސާ ފެނިފައިވަނީ މިދިޔަ މަހުގެ 23 ވަނަ ދުވަހު އެ ގެ ބަލައި، ފާސްކުރިއިރުގައެވެ.

ކޯޓު އަމުރެއްގެ ދަށުން ފުލުހުން، އެ ގެ ބަލައި ފާސްކުރި އިރު، ފައިސާ ހުރި ދަބަސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އަދި އެ ދަބަހުގައި މިލިއަނަކަށް ވުރެ ގިނަ ފައިސާ ހުރި ކަމަށް ވެސް މައުލޫމާތު ލިބެއެވެ.

މި ކަމާއިގުޅިގެން ކަމާގުޅުންހުރި އިދާރާތަކުގެ ރަސްމީބަހެއް ލިބޭގޮތެއް އަދިނުވެއެވެ.

ނިމިދިޔަ އެމްޑީޕީ ސަރުކާރުން ކުރިއަށްގެންދިޔަ ބިންވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓުގައި ނުހިމެނޭ ބަޔަކަށް ގޯތި ދޫކުރި މައްސަލައެއް ފެންމަތިވެ، ފުލުހުންނާއި އޭސީސީން މިހާރުގެންދަނީ ޖިނާއީ އަވަސް ތަހުގީގެއް ކުރަމުންނެވެ.

މި މައްސަލައިގާ 2024 ޑިސެމްބަރ 20 ވަނަ ދުވަހު 20 މީހެއްގެ ޕާސްޕޯޓް ހިފަހެއްޓިއެވެ. ނަމަވެސް ޑިސެމްބަރ 30 ވަނަ ދުވަހު ވަނީ އޭގެތެރެއިން 9 މީހެއްގެ ޕާސްޕޯޓް ދޫކޮށްލާފައެވެ.

ޕާސްޕޯޓް ދޫކޮށްލި މީހުންގެ ތެރޭގައި ފަޒުލް ރަޝީދާއި އޭނާގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ޕާސްޕޯޓެއް ނުހިމެނެއެވެ.