މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ދެމުން ގެންދާ ބަސް ދަތުރާއި ފެރީގެ ހިދުމަތް ދިނުމަށް ލަސްތަކެއް އައުމަކީ އެކަށީގެންވާ ކަމެއް ކަމުގައި އެ ކުންފުނިން ވިދާޅުވެއްޖެއެވެ.

އެ ކުންފުނިން ނެރުއްވި އިއުލާނެއްގައި ވަނީ ރާއްޖެއަށް ކުރަމުންދާ ވިއްސާރައިގާ މާލޭގެ އެކި ސަރަހައްދުގައި ފެންބޮޑުވެފައިވާތީ، ބަހުގެ ހިދުމަތުގައި ހިމެނޭ R1, R3 އަދި R7 ގެ ދަތުރުތައް ފަށާ އަދި ނިމޭ ސްޓޮޕް ވަގުތީގޮތުން މާފަންނު ބަސް ޓަރމިނަލަށް ބަދަލުކޮށްފައި ކަމަށެވެ.

މީގެއިތުރުން R10, R11, އަދި R12 ގެ ދަތުރުތައް ވަގުތީގޮތުން ހުއްޓާލާފައިވާ ކަމަށް ވެސް ވިދާޅުވެއެވެ.

އެމްޓީސީސީން ވިދާޅުވީ ބަސް ދަތުރާއި ފެރީ ހިދުމަތަށް ލަސްތަކެއް އުޅުމަކީ އެކަށީގެންވާ ކަމެއް ކަމަށާއި ބައެއް ރޫޓުތައް ކެންސަލް ކުރުމަކީ ވެސް އެކަށީގެންވާ ކަމެއް ކަމުގައި އެ އިއުލާނުގައި ވެއެވެ.

ބަސް ދަތުރުތަކާ ގުޅޭ އިތުރު މައުލޫމާތު ހޯދަން 1650 އަށް ގުޅުމަށް އެމްޓީސީސީން ވަނީ އެދިފައެވެ.