މިހައިތަނަށް 30،000 އަށްވުރެ ގިނަ ޓަނުގެ ފެން މާލެއިން ހިންދައިފިއެވެ.

އެމްއެންޑީއެފް އިން ހާމަކުރައްވާފައިވާ ގޮތުގައި ޖަނަވަރީ 3 ވަނަ ދުވަހު މާލެއަށް ކުރި ވިއްސާރައިގާ މިއަދު ހެނދުނު 07:45 އާާ ހަމައަށް 30406 ޓަން ގެ ފެން މާލެއިން ވަނީ ހިންދިފައެވެ. އަދި ފެންހިންދުމުގެ މަސައްކަތުގައި މިވަގުތު ސިފައިން ހަރަކާތްތެރިވަނީ ހަމައެކަނި މާލޭގެ ވެސްޓްޕާކް ސަރަހައްދުގައި ކަމަށެވެ.

މެޓް އޮފީހުން ބުނެފައިވަނީ ރާއްޖެއަށް ކުރަމުންދާ ވިއްސާރަ އަލިވާނެކަމަށް ލަފާކުރެވެނީ ހޯމަ ދުވަހު ކަމަށެވެ. އަދި މިއަދާއި މާދަމާ ވެސް މާލެ އާއި މާލެ ކައިރި ސަރަހައްދުތަކަށް ގުގުރުމާއެކު ވިއްސާރަކޮށް ބޯކޮށް ވާރޭ ވެހި، ވައި ވެސް ގަދަވާނެ ކަަމަށް ވަނީ ހާމަކޮށްފައެވެ.

މީގެއިތުރުން ރާއްޖޭގެ ކަނޑުތައް ވެސް ގަދަވާނެ ކަމަށާއި ރާޅުގެ އުސްމިން ހުންނާނީ 5 ފޫޓާއި 8 ފޫޓާއި ދެމެުގައި ކަމަށް ވަނީ ބުނެފައެވެ. އަދި ދިޔަވަރު ބޮޑުވާ ގަޑިތަކުގައި ބައެއް ރަށްރަށަށް އުދަ އެރުން އެކަށީގެންވާ ކަމަށް ވެސް ބުނެއެވެ.

މިއަދު ނެރުނު މޫސުމީ ބުލެޓިންގ ގައި ބުނީ އުތުރާއި މެދުރާއްޖެތެރޭގެ އެކި ހިސާބުތަކަށް މިއަދު ވެސް މޫސުން ގޯސްވާނެކަމަށެވެ. އަދި އެ ސަރަހައްދުގެ ރަށްތަކަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭ ވެހި، ގުގުރުން ވެސް އެކަށީގެންވާ ކަމަށް ވެސް ވަނީ ބުނެފައެވެ.

މީގެއިތުރުން ދެކުނުގެ ބައެއް ރަަށްތަކަށް ކެރީގެ އަސަރުކުރިނަމަވެސް އާންމުގޮތެއްގައި މޫސުން ރަނގަޅުވާނެ ކަމަށް އެ އިދާރާ އިން ބުނެއެވެ. އަދި ދެކުނުގެ ރަށްތަކަށް ހުޅަނގާއި ހުޅަނގުއުތުރުން އެހެން ހިސާބުތަކަށް އިރު އުތުރާއި އިރުން ގަޑިއަކު 8 މޭލާއި 18 މޭލާއި ދެމެދުގެ ބާރުމިނުގައި ވައި ޖެހޭނެކަަމަށް ލަފާކޮށްފައިވެއެވެ.

އެ އިދާރާއިން ވަނީ އުތުރާއި މެދުރާއްޖެތެރޭގައި ވިލާގަނޑުގައި ގަޑިއަކު 35 މޭލަށް ވައި ގަދަވާނެކަމަށް ލަފާކޮށްފައެވެ. އަދި ރާއްޖޭގެ ކަނޑުތައް އާދައިގެވަރަކަށް ގަދަވާނެކަމަށާއި ވިލާގަނޑުގައި އިތުރަށް ގަދަވާނެކަމަށް ވެސް ބުނެއެވެ.