ގުޅީފަޅުގެ މަގުތައް ތަރައްގީކުރުމަށް ސީނުކަރަ (ޗައިނާގެ) ކުންފުންޏެއް ކަމުގައިވާ ޗައިނާގެ މެޝިނަރީ އެންޑް އިންޖިނިއަރިންގ ކޯޕަރޭޝަން (ސީއެމްއީސީ) އާ އެކު އެއްބަސްވުމެއްގައި ސޮއިކޮށްފިއެވެ.

މިކަމަށްޓަކައި ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި ރައީސް ޑރ. މުޙައްމަދު މުޢިއްޒުއާއި ނައިބު ރައީސް އަލްއުސްތާޛް ހުސައިން މުހައްމަދު ލަތީފް އަދި ވަޒީރުންނާއި ބައެއް އެހެން އިއްޒަތްތެރިން ވެސް ބައިވެރިވެވަޑައިގެންނެވިއެވެ.

ގުޅިފަޅުގެ މަގުތަކާއި އާންމު އަސާސީ ހިދުމަތްތައް ތަރައްގީކުރުމުގެ އެއްބަސްވުމުގައި ރާއްޖެއިން ސޮއިކުރެއްވީ ކޮންސްޓްރަކްޝަން މިނިސްޓަރ ޑރ. ޢަބްދުﷲ މުއްތަލިބުއެވެ. ސީއެމްއީސީގެ ފަރާތުން ސޮއިކުރެއްވީ ރީޖަނަލް ޖެނެރަލް މެނޭޖަރ ޝެން ހައު ޖުން އެވެ.

މިނިސްޓަރ އަބްދުﷲ މުއްތަލިބު ވިދާޅުވީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގައި ސީއެމްއީސީއާއި އެ މިނިސްޓްރީ އާ ދެމެދު ސޮއިކުރި ފަހުމުނާމާގެ ދަށުން ސީއެމްއީސީއާ އެކު އެ މިނިސްޓްރީން ގުޅީފަޅުގެ ތަރައްގީއާ ގުޅޭ ޓެކްނިކަލް އެތައް މަސައްކަތްތަކެއް ކޮށްފައިވާ ކަމަށެވެ.

އޭގެތެރޭގައި ޕްރޮޖެކްޓް ސްކޯޕިންގ، ކޮންސެޕްޓު ލެވެލްގެ ޑިޒައިން އަދި ޓެކްނިކަލް ސްޕެސިފިކޭޝަންތައް ތައްޔާރުކޮށްފައިވާ ކަމަށް ވިދާޅުވިއެވެ.

މިނިސްޓަރު ވިދާޅުވީ މި އެއްބަސްވުމުގެ ދަށުން މައިގަނޑުގޮތެއްގައި ކުރާނީ ކަރަންޓު ޑިސްޓްރިބިއުޝަން ނިޒާމު ގާއިމްކުރުމާއ ފެނާއި ނަރުދަމާގެ ނިޒާމު ގާއިމްކުރުމާއި ޑީވޯޓަރިންގ ނިޒާމު ގާއިމްކުރުން ކަމަށެވެ. އަދި މަގުތައް ޒަމާނީ ފެންވަރަށް ހެދުމާއި ޑަކްޓިންގ ނިޒާމާއި ގޭސް ސްޓޯރޭޖާއި ޑިސްޓްރިބިއު ނިޒާމު ގާއިމްކުރާނެ ކަމަށް ވެސް ވިދާޅުވިއެވެ.

ސީއެމްއީގެ ޑެޕުއިޓީ މެނޭޖިންގ ޑިރެކްޓަރ ޝޭ ޙާ ވިދާޅުވީ މިއީ ރާއްޖޭގެ އިގުތިސާދީ ކުރިއެރުމަށް އެޅޭ މުހިންމު ފިޔަވަޅެއް ކަމަށެވެ. އަދި އެ މަޝްރޫއަކީ އެ ކުންފުންޏަށް ލިބުނު އަގުހުރި ފުރުސަތެއް ކަމަށެވެ.

މީގެއިތުރުން ރާއްޖެއަކީ އެ ކުންފުނީގެ ވަރަށް ގާތް ރަހުމަތްތެރިއެއް ކަމަށާއި ވޭތުވެދިޔަ 14 އަހަރު ތެރޭގައި ކަރަންޓާއި ބޯހިޔާވަހިކަމާއި ހަކަތައިގެ އެތައް މަޝްރޫއެއް ރާއްޖޭގެ އެކިކަންކޮޅުތަކުގައި އެކުންފުނިން ހިންގާފައިވާކަން އޭނާ ފާހަގަކުރެއްވިއެވެ.