ރައްޔިތުންނަށް އިގްތިސާދީ ބާރުވެރިކަން ހޯދައިދިނުމަށް ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ރައީސް ޑރ. މުޙައްމަދު މުޢިއްޒު ދެއްވައިފިއެވެ.

އެމަނިކުފާނު މި ޔަގީންކަންދެއްވީ ރާއްޖޭގައި މީހުން ދިރިއުޅޭ ހުރިހާ ރަށަކަށް ވަޑައިގެން، ރައްޔިތުންނާ ބައްދަލުކުރައްވައި، އެ ރައްޔިތުންގެ އަޑު އައްސަވައި، ރައްޔިތުން ބޭނުންވާ ކަންކަން އޮޅުންފިލުއްވުމަށް ފަށްޓަވައިގެން ކުރިއަށް ގެންދަވާ ސިލްސިލާ ދަތުރުފުޅުތަކުގެ ތެރެއިން ގދ. ވާދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.

ރައިސް ވިދާޅުވީ އުމްރާނީ ތަރައްގީއާއެކު އަޅުގަނޑުމެންގެ މުޖުތަމައަކީ ހެޔޮކަންކަމަށް އަމުރުކޮށް، ނުބައިކަންކަން ނަހީކުރާ ބައެއް ކަމުގައިވެ، ލޯކުރިމަތީގައި ގޯސްކަމެއް ހިންގާނަމަ އެކަމަށް ނޫނެކޭ ބުނަން ކެރޭ ބަޔަކަށް ވާންޖެހޭކަމަށެވެ.

މީގެއިތުރުން ރަށާއި ގައުމުގެ ތަރައްގީއަށް މަސައްކަތްކުރުމުގައި، ހުރިހާ ރައްޔިތުން ވެސް އެކުވެރިކަމާއެކު ކުރިއަށްވަޑައިގެން، އުންމީދު ކުރާ ތަރައްގީގެ މަސައްކަތްތައް ހަގީގަތަކަށް ހެއްދެވުމަކީ އަޒުމެއް ކަމުގައި ކަނޑައެޅުއްވުމަށް ވަނީ އިލްތިމާސްކުރައްވާފައެވެ.