އެމްޓީސީސީން ރާއްޖޭގެ އެކި ކަންކޮޅުތަކުގައި ހިންގާ މަޝްރޫއުތަކުގެ އަދާހަމަ ބަލައިލުމަށް ފަސޭހަގޮތެއް ތައާރަފްކޮށްފިއެވެ.

"ޕްރޮޖެކްޓް ޑޭޝްބޯޑު" ގެ ނަމުގައި މި ހިދުމަތް ތައާރަފްކޮށްފައިވާއިރު، އެ ކުންފުނިން ވަނީ މި ޑޭޝްބޯޑު ބޭނުންކޮށްގެން ރައްޔިތުންނަށް މައުލޫމާތު ހޯދޭނެ ޓިއުޓޯރިއަލެއް ވެސް ވަނީ މީސްމީޑިއާ އަށް ދޫކޮށްލާފައެވެ.

އެ ކުންފުނީގެ މެނޭޖިންގ ޑިރެކްޓަރ ރިޓަޔަރޑް ޑީސީޕީ އަހްމަދު ސައުދީގެ އިސްނެންގެވުމާއި އިރުޝާދުގެ ދަށުން އުފައްދާފައިވާ މި ޑޭޝްބޯޑުގެ މަގްސަދަކީ ރައްޔިތުންނަށް ދެފުށްފެންނަގޮތަށް ފަސޭހައިން އެ ކުންފުނިން ހިންގާ މަޝްރޫއުތަކުގެ އެންމެފަހުގެ މައުލޫމާތު ބެލޭނެ ފުރުސަތު ފަހިކޮށްދިނުން ކަމަށް ބުނެއެވެ.

އެގޮތުން މި ޑޭޝްބޯޑުގެ ޒަރީއާ އިން ކޮންމެތަނެއްގައި ހުރެވެސް އެ ހުރިހައި މައުލޫމާތެއް ފޯނު މެދުވެރިކޮށް ވެސް ބަލައިލެވޭނެކަމަށް އެމްޓީސީސީން ބުނެއެވެ. އޭގެތެރޭގައި މަޝްރޫއުގެ ބާވަތާއި ކުރެވޭ މަސައްކަތާއި އަގުތައް ހިމެނެއެވެ.

މީގެއިތުރުން މަޝްރޫއުތައް ނިމިފައިވާ އިންސައްތައާއި އެންމެފަހުގެ ސްޓޭޓަސްތައް ވެސް ހިމެނެއެވެ. މި ހުރިހައި މައުލޫމާތަކީ ވެސް އެމްޓީސީސީގެ އޮންލައިން ޕްރޮޖެކްޓު މެނޭޖްމެންޓު ސިސްޓަމްގެ އެހީގައި ވަގުތުން އަދާހަމަކުރާ މައުލޫމާތެވެ.