ރާއްޖޭގެ މޫސުން ގޯސްވާނެކަމަށް ލަފާކޮށް، މެދުރާއްޖެތެރެއިން ފެށިގެން ދެކުނަށް ހުދު ސަމާލު ނެރެފިއެވެ.

މޫސުމާއިބެހޭ ގައުމީ އިދަރާ އިން ވިދާޅުވީ ބ. އަތޮޅުން ފެށިގެން އައްޑޫ ސިޓީ އާ ހަމައަށް މޫސުން ގޯސްވާނެ ކަމަށެވެ. އަދި ގަޑިއަކު 19 މޭލާއި 24 މޭލަށް ވައިގަދަވާނެ ކަމަށެވެ.

މީގެއިތުރުން ކަނޑުތައް ވެސް ގަދަވާނެކަމަށް ލަފާކޮށް، ވިލާގަނޑުގައި 40 މޭލަށް ވައި ގަދަވާނެކަމަށް ބެލެވޭ ކަމަށް ވަނީ ވިދާޅުވެފައެވެ. އަދި ރާއްޖޭގެ އެކިހިސާބަށް ވިއްސާރަ ކުރާނެކަމަށާއި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާކަމުގައި ވެސް ހާމަކުރައްވާފައި ވެއެވެ.

ރާއްޖެއަށް މިހާރު ކުރަމުން މިދަނީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި އެކޮޅިގަނޑާ ގުޅިފައިވާ ލޯޕްރެޝަރ ޓްރަފްގެ ސަބަބުން ކުރަމުންދާ ވިއްސާރައެއް ކަމަށާއި ކުރިއަށް އޮތް ފަސް ދުވަހު ވެސް ރާއްޖެއަށް މޫސުން ގޮސްވާނެ ކަމަށް އެ އިދާރާ އިން ވަނީ ލަފާކުރައްވާފައެވެ.

އެހެންކަމުން މޫސުމަށް ބަލައި، އަދާހަމަކޮށްގެން ކަނޑުދަތުރަށް ފުރުމަށާއި ކޮންމެހެން ކުރަން ޖެހޭ ދަތުރެއް ފިޔަވައި ނުކުރުމަށް ވަނީ އިލްތިމާސް ކުރައްވާފައެވެ. އަދި ކަނޑުދަތުރުކުރާ އުޅަނދުފަހަރުގައި ސަލާމަތީ އާލާތްތައް ހަމައަށް ހުރިތޯ ބެލުމަށް ހާއްސަ ސަމާލުކަމެއް ދިނުމަށް ވެސް އެދިލައްވައެވެ.