ރާއްޖެއަށް މިހާރުކުރަމުންދާ ވިއްސާރާގައި މާލޭގެ ބައެއް މަގުތަކުގައި ފެން ބޮޑުވެފައިވާތީ، ފެން ހިންދުމުގެ މަސައްކަތް އެމްއެންޑީއެފް ފަޔަރ އެންޑް ރެސްކިޔު ސަރވިސް އިން ފަށައިފިއެވެ.

އެ އިދާރާ އިން މި މަސައްކަތްކުރާއިރު، މޫސުމާއިބެހޭ ގައުމީ އިދާރާ އިން ވަނީ ބ. އަތޮޅުން ފެށިގެން ތ. އަތޮޅާ ހަމައަށް އަދިލ. އަތޮޅަށް ވެސް ރީނދޫ ސަމާލު ނެރެފައެވެ.

އެގޮތުން މި ސަރަހައްދުތަކަށް ގުގުރުމާ އެކު ބޯކޮށް ވާރޭވެހޭނެ ކަމަށް ލަފާކޮށްފައިވާއިރު، ވިލާގަނޑުގައި ގަޑިއަކު 45 މޭލަށް ވައިގަދަވާނެކަމަށް ލަފާކޮށްފައި ވެއެވެ. އަދި އެ ސަރަހައްދުގެ ކަނޑުތައް ގަދަވާނެ ކަމަށް ވެސް ވަނީ ބުނެފައެވެ.

ރާއްޖެއަށް މިހާރު ކުރަމުން މިދަނީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި އެކޮޅިގަނޑާ ގުޅިފައިވާ ލޯޕްރެޝަރ ޓްރަފްގެ ސަބަބުން ކުރަމުންދާ ވިއްސާރައެއް ކަމަށާއި ކުރިއަށް އޮތް ފަސް ދުވަހު ވެސް ރާއްޖެއަށް މޫސުން ގޮސްވާނެ ކަމަށް އެ އިދާރާ އިން ވަނީ ލަފާކުރައްވާފައެވެ.

އެހެންކަމުން މޫސުމަށް ބަލައި، އަދާހަމަކޮށްގެން ކަނޑުދަތުރަށް ފުރުމަށާއި ކޮންމެހެން ކުރަން ޖެހޭ ދަތުރެއް ފިޔަވައި ނުކުރުމަށް ވަނީ އިލްތިމާސް ކުރައްވާފައެވެ. އަދި ކަނޑުދަތުރުކުރާ އުޅަނދުފަހަރުގައި ސަލާމަތީ އާލާތްތައް ހަމައަށް ހުރިތޯ ބެލުމަށް ހާއްސަ ސަމާލުކަމެއް ދިނުމަށް ވެސް އެދިލައްވައެވެ.