ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް މޯލްޑިވްސް އިމިގްރޭޝަނުން ކުރިއަށްގެންދާ އޮޕަރޭޝަންގައި ޑިސެމްބަރ 28 ވަނަ ދުވަހު ވެސް ފަސް މީހުން އެ އިދާރާގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ވިދާޅުވީ މިއީ ކޮފީ ޝޮޕްތަކެއް ބަލައި، ފާސްކުރިއިރު ގަވައިދާ ހިލާފަށް އުޅެމުންދިޔަ 5 ބިދޭސީން ކަމަށެވެ. އިއްޔެ ކުރިއަށްގެންދިޔަ އޮޕަރޭޝަނަކީ މާލޭގެ ކޮފީ ޝޮޕްތަކަށް ހާއްސަކޮށްގެން ކުރިއަށްގެންދިޔަ ރެއިޑު އޮޕަރޭޝަނެއް ކަމަށް ވެސް ވިދާޅުވިއެވެ.

މި އޮޕަރޭޝަނުގައި 6 ތަނެއް ބަލައި، ފާސްކޮށްފައިވާ ކަމަށް އެ އިދާރާ އިން ވިދާޅުވިއެވެ.

އިމިގްރޭޝަނުން ހާމަކުރައްވަފައިވާގޮތުގައި މި އަހަރުގެ އަމާޒަކީ ގަވާއިދާ ހިލާފަށް އުޅޭ 5،000 ބިދޭސީން ފޮނުވައިލުން ކަމަށާއި އެ އަމާޒަށް މިހާރު ވާސިލުވެފައިވާ ކަމަށެވެ.

މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުން ކަމަށްވާއިުރު، މިހައިތަަނަށް 18،919 ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށް ހޯމް މިނިސްޓްރީން ވަނީ ހާމަކުރައްވާފައެވެ.

ގަވައިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ފުރަތަމަ މަރުހަލާގެ ދަށުން 'އޮޕަރޭޝަން ކުރަނގި' ފަށާފައިވަނީ މިއަހަރުގެ މެއި މަހުގެ 2 ވަނަ ދުވަހުއެވެ.