މި ފެށޭ 2025 ވަނަ އަހަރަށް ދިރާގުން ތައްޔާރުކޮށްފައިވާ ކަލަންޑަރު ލޯންޗުކޮށްފިއެވެ.

'މިނިވަންކަން މަތީ އަބަދަށް' މި ޝިއާރަށް ތައްޔާރުކޮށްފައިވާ ކަލަންޑަރު ޑިސެމްބަރ 26 ވަނަ ދުވަހު ލޯންޗުކޮށްދެއްވީ ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) ގެ މެނޭޖިންގް ޑިރެކްޓަރ މުހައްމަދު މައުރޫފް ޖަމީލާއި އެކުންފުނީގެ ޑިރެކްޓަރުންގެ ބޯޑުގެ ޗެއަރމަން، އަހުމަދު ނާސިފްއެވެ.

މި ކަލަންޑަރު އިފްތިތާހުކުރީ ހުޅުމާލޭގެ ރައްޔިތުންނަށް ދެމުންގެންދާ ހިދުމަތް އިތުރަށް ހަރުދަނާކުރުމަށް އެޗް.ޑީ.ސީއާއި ދިރާގު ގުޅިގެން ކުރަމުންދާ މަސައްކަތްތަކާ ބެހޭގޮތުން އެޗް.ޑީ.ސީއާއެކު ބޭއްވި ބައްދަލުވުމުގައެވެ.

ދިރާގުން ބުނީ ރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތުގައި އެކުލަވާލާފައިވާ މި ކަލަންޑަރުގެ ކޮންމެ މަހެއްގައި ވެސް ދިވެހި ސަގާފަތާއި އާދަކާދަތަކާ ގުޅުވާފައިވާ ކަމަށެވެ. އަދި ގައުމިއްޔަތު ރަމްޒުކޮށްދޭ ނިޝާނެއް ދައްކުވައިދނެ ކަމަށެވެ.

މީގެއިތުރުން ކޮންމެ މަހެއްގައި ދައްކުވައިދޭ ނިޝާނާއި ބެހޭ ވީޑިއޯއެއް ނެރުމަށް ވެސް ނިންމާފައިވާ ކަމަށާއި މި ވީޑިއޯގައި މިކަމާ ބެހޭ އިތުރު މައުލޫމާތު ހިމަނާފައިވާނެ ކަމަށް ބުނެއެވެ. އަދި މިއީ ދިވެހި ތާރީހާއި ތަރިކަތައް އިތުރަށް އުނގެނުމަށް ބޭނުންތެރި ވަސީލަތެއް ކަމަށް ވެސް ވަނީ ބުނެފައެވެ.